Dost səfəri: Özbəkistan-Azərbaycan münasibətləri yeni mərhələdə
Bakı, 29 avqust, AZƏRTAC
Dövlətin güc və qüdrətinin müəyyən olunmasında onun beynəlxalq arenadakı mövqeyi, digər ölkələrlə münasibətdə yürütdüyü düşünülmüş xarici siyasət kursu mühüm əhəmiyyətə malikdir. Özbəkistan Respublikasının Prezidenti Şavkat Mirziyoyevin bu istiqamətdə müdrik siyasəti ölkənin ildən-ilə inkişafı üçün möhkəm zəmin yaradır. Avqustda Azərbaycana reallaşdırılan səfərin gələcəkdə sürətli inkişafa və əməkdaşlıq nəticəsində əldə olunacaq uğurlu nəticələrə imkan yaradan qapı açacağını vurğulamaq lazımdır.
AZƏRTAC xəbər verir ki, bu fikirlər Fərqanə Dövlət Universitetinin rektoru, pedaqoji elmlər doktoru, professor Baxodirjon Şermuxammedovun “Dost səfəri: Özbəkistan-Azərbaycan münasibətləri yeni mərhələdə” sərlövhəli məqaləsində yer alıb. Məqaləni təqdim edirik.
1918-ci ildə ərazi bütövlüyü və istiqlaliyyət uğrunda mübarizə aparan böyük və cəsur Azərbaycan xalqı Cənubi Qafqazda müstəqilliyini qazanaraq milli dövlət qurdu. Azərbaycanın Dövlət Himninin musiqisinin bəstəkarı Üzeyir Hacıbəyovun qeyd etdiyi kimi, Azərbaycan Xalq Cümhuriyyəti sağlam milli təməl əsasında və Türk ruhu ilə doğulub”.
Özbəkistan və Azərbaycan arasındakı dostluğun və qardaşlığın, ortaq mədəniyyətin və ənənələrin kökləri çox qədim dövrə uzanmaqdadır. Bu iki xalqın ortaq tarix və mənəvi dəyərlərlə bir-birinə bağlı olduğu heç kimə sirr deyil. Məşhur özbək şairi Abdulla Oripov Azərbaycan və özbək xalqları arasında dostluğu tərənnüm edərək yazmışdır:
“Başınızı ehtiramla dik tutaraq,
Bu gün Azar - Özbəkistan günüdür.
Qoy, min illik tarix danışsın
Bu dostluğa şübhə varmı?
Özbəkəm, haraya gedəcəyəm?
Bu, Azarın inci dilidir.
Dostluq eşqdir, dostum.
O sərhəd, əngəl tanımaz”.
Bu gözəl şeirlərə Azərbaycan ilə Özbəkistan arasındakı böyük dostluğun heykəli demək olar. Özbək şair Azərbaycan xalqının simasında hər zaman fədakar və sadiq dost görməkdədir. Azərbaycan dilinin gözəlliyi, incə cazibəsi və ahəngliyi diqqəti cəlb edir. O, dostluğun sonsuzluğunu və xoş gücünü təcəssüm etdirir.
Qardaş xalqlarımızın bir-birinə səmimi münasibəti, maraqlarına ehtiramı əlaqələrimizin inkişafına, əməkdaşlığın ən yüksək səviyyəyə çatmasına yol açıb. Bu günə qədər reallaşdırılan ondan çox qarşılıqlı səfər iki ölkə üçün də məhsuldar olub.
Hazırda iki ölkə bir çox sahələrdə əməkdaşlıq edir. Dövlət başçıları arasında səmimi və dostanə münasibətlər bütün sahələrdə genişmiqyaslı tərəfdaşlığa imkan yaradır. Özbəkistan Prezidenti Şavkat Mirziyoyevin bu il Azərbaycana səfəri ölkələrimiz arasında əməkdaşlıqda yeni mərhələnin başlaması, əlaqələrin genişlənməsi və dərinləşməsi üçün yeni əsaslar yaratdı.
Özbəkistan Prezidentinin Azərbaycanda görkəmli qarşılanması mərasimi Azərbaycan xalqının qonaqpərvərliyini və xalqımıza dərin ehtiramını göstərdi. Əlbəttə, bunun rəmzi mənası da var. Belə ki, Özbəkistan ilə Azərbaycan arasında əlaqələr yeni mərhələyə qədəm qoyur. Özbəkistan daim Azərbaycanın ərazi bütövlüyünü, Qarabağda sülhün və sabitliyin bərqərar olmasını ciddi dəstəkləyir, burada həyata keçirilən bərpa-quruculuq işlərini yüksək dəyərləndirir.
Səfər çərçivəsində keçirilən görüşlərdə əməkdaşlığın əsas istiqamətləri müəyyənləşdirilib, avtomobil sənayesi, metallurgiya, enerji, kənd təsərrüfatı, elektrik mühəndisliyi, tekstil, sənaye, turizm və digər sahələrdə böyük layihələrlə bağlı fikir mübadiləsi aparılıb. Müzakirələrdə mədəni və iqtisadi sahələrə, sənaye sahəsində əməkdaşlığın inkişafına, logistik infrastruktura da xüsusi diqqət yetirilməsi çox önəmlidir. Yeni tədarük zəncirinin və infrastrukturun inşasının genişləndirilməsi ilə yanaşı, yükdaşımaların həcminin artırılması ilə bağlı layihələrin reallaşdırılmasına başlanılmasının da hər iki ölkəyə böyük fayda qazandıracağı nəzərdə tutulur.
Mədəni tədbirlər də əməkdaşlıqda xüsusi yer tutur. Qısa müddət əvvəl Azərbaycanda əlaqələrimizin inkişafına xidmət edən “Özbəkistan Mədəniyyəti Günləri” təşkil olundu. Xüsusilə özbək ədəbiyyatının böyük nümayəndəsi Abdullah Kadirinin Azərbaycan dilində çapdan çıxan məşhur “Ötən günlər” (Otgan kunlar) əsərinin Bakıda təqdimatı qardaşlarımızın özbək ədəbiyyatına göstərdiyi böyük ehtiramın və marağın nümunəsidir.
Şübhəsiz ki, bu görüşlər dövlətlərimiz arasında strateji əlaqələrin daha da güclənməsinə xidmət edəcək. Çünki məqsəd aydın, görüşlərimiz eyni, birlik uğrunda cəhdlərimiz sarsılmazdır.
Bundan başqa, əməkdaşlıq şəraitində strateji əhəmiyyətə malik nəqliyyat və tranzit imkanlarının genişləndirilməsi də çox böyük əhəmiyyət daşıyır. Bu kontekstdə Bakı Limanı vasitəsilə yükdaşımaların həcminin artırılması təklifi bu sahədə problemlərə ən uyğun həll yoludur. Dövlət başçıları birgə “Yol xəritələri”nin hazırlanması və əldə olunan razılaşmaların tam şəkildə həyata keçirilməsi istiqamətində mexanizmlərin yaradılması ilə bağlı qərarlar qəbul etdilər. Özbəkistan-Azərbaycan Ali Dövlətlərarası Şurasının yaradılması haqqında müqavilənin imzalanması münasibətlərimizin gələcəkdə daha da gücləndirilməsi baxımından böyük önəm daşıyır.
Bu gün Azərbaycan və özbək xalqları arasında uzunmüddətli qardaşlıq və dostluq əlaqələri iqtisadi və mədəni sahədə tərəfdaşlıq əsasında genişlənərək, əməkdaşlığımızın müxtəlif sahələrdə daha da dərinləşdirilməsinə xidmət edir.
Bölmənin digər xəbərləri
