Dostuq və qardaşlıq rəmzi: Kahramanmaraşda Heydər Əliyev adına məktəbin açılışı olub
Kahramanmaraş, 11 sentyabr, AZƏRTAC
2023-cü ilin dağıdıcı zəlzələlərindən zərər çəkmiş Türkiyənin Kahramanmaraş şəhərində sentyabrın 11-də Heydər Əliyev adına ibtidai məktəbin rəsmi açılış mərasimi olub.
AZƏRTAC xəbər verir ki, tikintisi davam edən “Azərbaycan” məhəlləsində yerləşən bu təhsil müəssisəsinin açılışında Azərbaycanın elm və təhsil naziri Emin Əmrullayev və Türkiyənin milli təhsil naziri Yusuf Tekin iştirak ediblər.
Məktəbin şagirdlərdən biri Azərbaycan-Türkiyə dostluğu və həmrəyliyi barədə şeir oxuyub. Sonra vilayətin rəqs kollektivlərinin çıxışı olub.
Məktəb binasında iki qardaş ölkənin Dövlət bayraqları, həmçinin prezidentlər İlham Əliyevin və Rəcəb Tayyib Ərdoğanın, Ümummilli Lider Heydər Əliyevin və Türkiyə Cümhuriyyətinin banisi Mustafa Kamal Atatürkün rəsmləri olan plakatlar asılıb.
Tədbirdə çıxış edən Azərbaycanın elm və təhsil naziri Emin Əmrullayev bildirib ki, Azərbaycan ilə Türkiyənin qardaşlığı öz əksini konkret layihələrdə və proqramlarda tapır. Nazir, həmçinin qeyd edib: “Qardaşlığımızın təzahürlərindən biri Kahramanmaraşda Heydər Əliyev adına ibtidai məktəb oldu. Ümidvaram ki, bu məktəb tezliklə Azərbaycanın məktəblərindən biri ilə qardaşlaşacaq, türkiyəli və azərbaycanlı şagirdlər və pedaqoqlar isə qarşılıqlı səfərlər edəcəklər”.
Emin Əmrullayev iki qardaş ölkə arasında təhsil sahəsində əməkdaşlıq tarixində daha bir mühüm hadisəyə - Bakıda Azərbaycan-Türkiyə Universitetinin açılışına diqqət çəkib. Nazir yeni universiteti Türkiyə və Azərbaycan liderləri arasında dostluğun ən yaxşı təzahürü adlandırıb.
Nazir xatırladıb ki, Bakıda bu təhsil layihəsi Türkiyənin üç universiteti və Azərbaycan universitetlərindən birinin birgə əməkdaşlığı ilə həyata keçirilib.
O, həmçinin Xankəndidə Qarabağ Universitetinin açılışını xatırladaraq deyib. “Əminəm ki, Qarabağ Universiteti bütün Türk dünyasının daha bir təhsil mərkəzinə çevriləcək”.
Təhsil naziri iki qardaş ölkənin şagirdlərini yeni tədris ili münasibətilə təbrik edib. Deyib ki, gənc nəslin vətənpərvərlik və Azərbaycan ilə Türkiyə arasında sarsılmaz dostluq ruhunda tərbiyə olunması üçün bütün səylər səfərbər edilməlidir.
Qeyd edək ki, təbii fəlakət zonasında məktəb tikintisi Azərbaycan hökumətinin ayırdığı vəsait hesabına Azərbaycan Mənzil İnşaatı Dövlət Agentliyinin (MİDA) xətti ilə həyata keçirilib.
Qardaş ölkənin milli təhsil naziri Yusuf Tekin öz növbəsində Türkiyədə təbii fəlakət zonasının bərpasına verdiyi töhfəyə görə Prezident İlham Əliyevə və Azərbaycan hökumətinə təşəkkür edib.
“Biz bütün dost ölkələrə, xüsusən də Azərbaycana, qardaş ölkənin hər bir sakininə minnətdarıq”, - deyə nazir vurğulayıb.
Yusuf Tekin zəlzələlərin mənfi nəticələrinin tezliklə tamamilə aradan qaldırılacağına və təbii fəlakət zonasındakı bütün təhsil müəssisələrinin işini tam şəkildə bərpa edəcəyinə əminliyini bildirib.
Sonra Azərbaycanın Ankaradakı səfiri Rəşad Məmmədov və Kahramanmaraş vilayətinin rəhbər şəxsləri çıxış ediblər.
Daha sonra nazirlər uşaqlarla birlikdə Heydər Əliyev adına ibtidai məktəbin rəmzi açılışını bildirən lenti kəsib, Ümummilli Lider Heydər Əliyevin və Türkiyə Cümhuriyyətinin qurucusu Mustafa Kamal Atatürkün abidəsi önünə gül dəstələri qoyublar.
Emin Əmrullayev və Yusuf Tekin təhsil ocağının binasına baxış keçirib, xatirə şəkli çəkdiriblər.
Qeyd edək ki, təhsil ocağının üçmərtəbəli binasında 20-dən çox sinif otağı yerləşir. Məktəbdə ibtidai siniflərdə dərslərlə yanaşı, Azərbaycan xalqının Ümummilli Lideri Heydər Əliyevin də adını daşıyan hazırlıq şöbəsində məşğələlər üçün otaqlar ayrılıb.
Məktəb ən müasir tələblərə uyğun, tədris prosesi üçün lazım olan bütün avadanlıqla təchiz edilib.
Bu təhsil ocağında idman zalı, kitabxana, məscid, yeməkxana, zərurət yarandıqda sığınacaq kimi istifadə oluna biləcək otaq var. Bundan əlavə, burada basketbol, həmçinin, balacalar üçün oyun meydançaları yaradılıb. Məktəbin ərazisi abadlaşdırılıb. Binada əlilliyi olan uşaqların da təhsil almaları üçün zəruri şərait yaradılıb.
Tezliklə ibtidai siniflərdə dərslər başlayacaq. Kahramanmaraş rəhbərliyini bir sıra qəzalı məktəb binalarını sökməyə məcbur edən keçənilki faciənin miqyasını nəzərə alsaq, tədris prosesi iki növbədə təşkil edilə bilər. Vilayətin digər təhsil ocaqlarından yüzlərlə şagird Heydər Əliyev adına ibtidai məktəbə köçürüləcək.
Məktəbin açılış mərasimində Azərbaycanın Ankaradakı diplomatik nümayəndəliyinin əməkdaşları, MİDA-nın əməkdaşları, Kahramanmaraş vilayətinin rəhbərliyi də iştirak ediblər.
Ramin Abdullayev
AZƏRTAC-ın xüsusi müxbiri
Kahramanmaraş
Bölmənin digər xəbərləri
