İQTİSADİYYAT
DÖVLƏT GÖMRÜK KOMİTƏSİ MƏTBUAT XİDMƏTİNİN MƏLUMATI
Sentyabrin 14-də Dövlət Gömrük Komitəsinin sədri, gömrük xidməti general-polkovniki Kəmaləddin Heydərov T R A S E K A layihəsi xətti ilə respublikamıza işgüzar səfərə gələn nümayəndə heyəti ilə görüşdü. Azərbaycan gömrük xidmətinin keçdiyi yol barədə qonaqlara məlumat verən DGK sədri K.Heydərov aparılan islahatlar nəticəsində gömrük sisteminin beynəlxalq standartlara uyğun qurulması sahəsində nailiyyətlərin qazanıldığını konkret faktlarla şərh etmişdir. O, xüsusilə vurğulamışdır ki, beynəlxalq təşkilatlarla Dövlət Gömrük Komitəsinin sıx əməkdaşlığı, eyni zamanda beynəlxalq layihələrin həyata keçirilməsində qarşılıqlı münasibətlərin dərinləşməsi bu sahədə özünün müsbət nəticələrini göstərməkdədir. Bu cəhətdən
T R A S E K A və Tasis proqramları çərçivəsində həyata keçirilən məqsədyönlü tədbirlər, gömrük prosedurlarının sadələşdirilməsi, sərhəd keçid məntəqələrinin dünya standartlarına uyğun texniki nəzarət vasitələri ilə təmin olunması tranzit keçən yüklərin gömrük rəsmiləşdirilməsinin tez və operativliyinə səbəb olmaqla boşdayanmaların aradan qaldırılmasına, gömrük nəzarətinin qısa vaxtda yerinə yetirilməsinə imkan vermişdir. Komitə sədri həmçinin 1998-ci ilin sentyabr ayında Bakı şəhərində Avropa-Qafqaz- Asiya nəqliyyat dəhlizinin əsasını qoyan iclasın keçirilməsini və bu yol vasitəsilə Avropadan Asiyaya tranzit yüklərin daşınması üçün müvafiq sazişin imzalanması və həmin sazişdə texniki əlavələrdən birinin də məhz gömrüklə bağlı olduğunu xatırladaraq həmin yolun reallaşması üçün gömrük orqanlarının qarşısında dayanan vəzifələrin əməli həlli üçün konkret addımlar atıldığını diqqətə çatdırmışdır. Onun sözlərinə görə T R A S E K A layihəsinin gerçəkləşməsi həm də “Qərb-Şərq” dəhlizi ilə dövlətlərarası iqtisadi əlaqələrin daha da genişlənməsinə, həm də mal axının güclənməsinə səbəb olacaqdır.
Respublikamıza gəlişlərinin məqsədini açıqlayan nümayəndə heyətinin üzvlərindən Dünya Gömrük Təşkilatının keçmiş direktoru Corc Diter Qotşlix, T R A S E K A-nın layihə rəhbəri Piter Reyndcer, Verner Spenhof və başqaları məlumat verdilər ki, sentyabrın 17-də Bakıda T R A S E K A hökumətlərarası komissiyanın daimi nümayəndəliyində seminar keçirilməsi nəzərdə tutulmuşdur. Seminarda əsasən T R A S E K A -nın əhatə etdiyi ölkələrdə tranzit tariflər üzrə vahid siyasətin hazırlanması, dəmir yolu, liman və gəmiçiliyə aid məsələlərin müzakirəsinin aparılacağı nəzərdə tutulmuşdur. Qonaqlar belə bir məqama da toxunmuşlar ki,
T R A S E K A regionunda yerləşən dövlətlər arasında sərhəd auditi keçirilmiş, bu layihəyə cəlb olunan ölkələrin mütəxəssislərinin məlumatları toplandıqdan sonra bu təkliflər hər bir ölkənin gömrük orqanlarına təqdim olunacaqdır.
Azərbaycan Gömrük Təşkilatının T R A S E K A-nın tədbirlərində yaxından iştirak etdiyini razılıqla vurğulayan qonaqlar Avropa ölkələrindən daşınan yüklərin Azərbaycan ərazisi vasitəsi ilə Asiya ölkələrinə daşınmasında iş aparıldığını nəzərə çarpdırmışlar. Dövlət Gömrük Komitəsinin sədri Kəmaləddin Heydərov belə görüşlərin mütəmadi xarakter alması üçün işçi qrupunun yaradılması və daimi əlaqələrin olmasını bütövlükdə işlərin qaydasında getməsinə təkan verəcəyini söyləmişdir.
Görüşdə maraq doğuran bir sıra digər məsələlər barəsində də müzakirələr aparılmışdır.