Dövlət Neft Şirkətinin ekologiya idarəsində polixlorbifenilin təyini ilə bağlı treninq keçirilmişdir
Bakı, 17 oktyabr (AZƏRTAC). “Davamlı üzvi birləşmələr haqqında” Stokholm Konvensiyasına daxil edilmiş polixlorbifenil maddəsinin təyini ilə bağlı Azərbaycan Respublikası Dövlət Neft Şirkətinin (ARDNŞ) ekologiya idarəsinin ekoloji monitorinq departamentinin aidiyyəti mütəxəssislərinə təlim keçirilmişdir.
AZƏRTAC xəbər verir ki, təlim zamanı elm və texnika şöbəsinin əməkdaşları tərəfindən ekoloji monitorinqlərdə iştirak edən mütəxəssislərə həmin maddənin təyini üçün müəssisələrdə aparılacaq işlər haqqında məlumatlar verilmişdir. Təlim iştirakçılarına təyin olunmuş avadanlığın qeydiyyatının aparılması üçün metodika ilə təsdiq edilmiş müvafiq formaların doldurulması və yağlardan nümunələrin götürülməsi təcrübələri haqqında ətraflı məlumatlar çatdırılmışdır.
2010-cu ildən başlayaraq ekologiya idarəsi tərəfindən mərkəzləşdirilmiş qaydada polixlorbifenil birləşmələrin inventarlaşdırılması aparılır və onların utilizasiyası üzrə müvafiq planlar hazırlanır.
Bölmənin digər xəbərləri
