SİYASƏT
Dövlət Qulluğu Məsələləri üzrə Komissiya tərəfindən elan edilmiş müsabiqənin nəticələri açıqlanıb
Komissiyadan AZƏRTAC-a bildirilib ki, müsabiqədə iştirak etmək üçün 2427-si (32,96 faiz) qadın olmaqla 7364 namizəd qeydə alınıb. Qeydə alınmış 7364 namizədin 75,62 faizini gənclər təşkil edib. Namizədlərdən 2611 nəfəri (bütün namizədlərin 35,46 faizi) test imtahanında iştirak etməyib.
Test imtahanı mərhələsində iştirak edən namizədlərdən 387-si (29,23 faiz) qadın olmaqla 1371 nəfəri (bütün namizədlərin 18,62 faizi) qanunvericiliyə müvafiq olaraq müsabiqənin test mərhələsini uğurla başa vurub. Test mərhələsini uğurla keçənlərin 78,77 faizini gənc namizədlər təşkil edib.
Müsabiqənin müsahibə mərhələsi iyunun 12 -də və sentyabrın 10-da keçirilib.
Müsahibədən uğurla keçən namizədlərin şəxsi işləri qanunvericiliyə uyğun qaydada və müddətdə dövlət orqanlarına göndərilib.
Müsahibə mərhələsinin nəticələrinə görə daha çox namizədin uğur qazandığı dövlət orqanları bunlardır: Dövlət Statistika Komitəsi (65 faiz) müsahibə üzrə qeydə alınmış 46 namizəddən 30-u; Əmək və Əhalinin Sosial Müdafiəsi Nazirliyi (48 faiz) müsahibə üzrə qeydə alınmış 69 namizəddən 33-ü; Gənclər və İdman Nazirliyi (46 faiz) müsahibə üzrə qeydə alınmış 41 namizəddən 19-u; Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyi (44 faiz) müsahibə üzrə qeydə alınmış 70 namizəddən 31-i; Dini Qurumlarla İş üzrə Dövlət Komitəsi (44 faiz) müsahibə üzrə qeydə alınmış 25 namizəddən 11-i; İqtisadiyyat və Sənaye Nazirliyi (41 faiz) müsahibə üzrə qeydə alınmış 75 namizəddən 31-i; Dövlət Torpaq və Xəritəçəkmə Komitəsi (39 faiz) müsahibə üzrə qeydə alınmış 28 namizəddən 11-i;
Müsahibə mərhələsində iştirak etmək üçün qeydiyyatdan keçmiş 1157 namizəddən 111 nəfəri müsahibədə iştirak etməyib, 2 nəfər isə müsahibədə iştirak etməkdən imtina edib. Namizədlərdən 395-i müsahibədən uğurla keçib, 649-u vəzifəyə uyğun hesab edilməyib.