Dövlət Xidmətinin yaranma günü qeyd edilib
Bakı, 13 fevral, AZƏRTAC
Fevralın 13-də Səfərbərlik və Hərbi Xidmətə Çağırış üzrə Dövlət Xidmətinin (SHXÇDX) yaradılmasının 14-cü ildönümü münasibətilə Dövlət Xidmətinin rəisi general-mayor Mürsəl İbrahimov və qurumun şəxsi heyəti Fəxri xiyabanı ziyarət edərək Ulu Öndər Heydər Əliyevin məzarı önünə əklil və gül dəstələri qoyub, əziz xatirəsini dərin ehtiramla yad ediblər.
Bu barədə AZƏRTAC-a SHXÇDX-dən məlumat verilib.
Bildirilib ki, görkəmli oftalmoloq-alim, akademik Zərifə Əliyevanın da xatirəsi anılıb, məzarı üzərinə tər çiçək dəstələri düzülüb. Daha sonra Şəhidlər xiyabanında Azərbaycanın müstəqilliyi və ərazi bütövlüyü uğrunda canlarından keçmiş Vətən övladlarının unudulmaz xatirəsi yad edilib, “Əbədi məşəl” abidə kompleksinin önünə əklil qoyulub.
Ziyarətdən sonra xidmətin aparatında qurumun yaradılmasının 14 illiyinə həsr olunan mərasim keçirilib. Əvvəlcə Ulu Öndər Heydər Əliyevin və Azərbaycanın ərazi bütövlüyü və suverenliyi uğrunda canından keçən şəhidlərin xatirəsi bir dəqiqəlik sükutla yad edilib və Dövlət Himni səsləndirilib.
Tədbirdə SHXÇDX-nin rəisi general-mayor Mürsəl İbrahimov görülmüş işlər barədə ətraflı məruzə ilə çıxış edib.
Mürsəl İbrahimov son illər ərzində Dövlət Xidmətinin fəaliyyətindəki inkişaf, aparılan islahatlar, həmçinin Müzəffər Ali Baş Komandan İlham Əliyev tərəfindən qarşıya qoyulan tapşırıqların icrasının gedişatı barədə ətraflı məlumat verib.
Tədbirdə Xidmət tərəfindən 2025-ci ildə görülən işlərdən bəhs edən hesabat video çarxı nümayiş olunub.
Tədbirdə bir qrup əməkdaşın təltif edilməsi barədə Silahlı Qüvvələrin Ali Baş Komandanı İlham Əliyevin imzaladığı müvafiq Sərəncam SHXÇDX-nin məsul şəxsi Tehran Babatov tərəfindən şəxsi heyətə elan olunub.
Daha sonra xidmət rəisinin imzaladığı əmrlər də elan olunaraq xidmətdə fərqlənənlərə hərbi rütbələr, medallar və fəxri fərmanlar təqdim edilib.
Bölmənin digər xəbərləri
