Dövlətimizin başçısı müşavirədəki nitqində Azərbaycanın növbəti illər üçün inkişaf istiqamətlərini müəyyənləşdirdi
Bakı, 16 aprel, Səadət Hakıyeva, AZƏRTAC
Azərbaycan Prezidentinin 2020-ci ilin birinci rübünün sosial-iqtisadi yekunlarına həsr olunan videokonfrans şəklində müşavirədəki nitqi pandemiya ilə mübarizə dövrünündə görülən tədbirləri əhatə etməklə bərabər, həm də strategiya xarakterli bir çıxış idi. Müşavirənin nəticələri onu deməyə əsas verir ki, Azərbaycanda indiyədək aparılan islahatlar öz müsbət təsirini bütün sahələrdə büruzə verməkdədir. Biz bunu koronavirusla mübarizə dövrünə təsadüf edən ilin ilk aylarında daha aydın gördük.
Bu sözləri AZƏRTAC-a açıqlamasında Milli Məclisin deputatı Tamam Cəfərova deyib.
Deputat bildirib ki, Prezident İlham Əliyev müşavirədəki nitqində təkcə 2020-ci ilin pandemiya dövründəki mövcud vəziyyətdən danışmadı, həm də müxtəlif istiqamətlərdə həyata keçirilən tədbirlər planından, 2018-ci ildəki prezident seçkilərindən sonra başlayan islahatların davam etdirilməsindən, gələcəkdə dövlətin qarşısında duran vəzifələrdən, atılacaq iqtisadi addımlardan, illərdir həllini gözləyən Dağlıq Qarabağ problemindən və s. məsələlərdən geniş bəhs etdi. “Prezident İlham Əliyev epidemiyanın bütün dünyada iqtisadi böhran yaratdığını diqqətə çatdıraraq qeyd etdi ki, cari ilin ilk iki ayından davam edən inkişaf prosesi mart ayında yavaşısa da, ümumilikdə, yenə inkişaf, tərəqqi var. Bütün dünyada problem yaşanır və Azərbaycan da dünyanın bir parçasıdır, amma vaxtında atılan addımlar, görülən tədbirlər və düşünülmüş siyasət nəticəsində proses nəzarət altına alındı. Əgər bu addımlar vaxtında atılmasaydı, düşünülmüş strategiya çərçivəsində məhdudlaşdırıcı rejim sərtləşdirilməsəydi, bu gün xəstələrin sayı min yox, bəlkə 10 min, 20 min ola bilərdi. Bu kontekstdə hökumətin görəcəyi işlərdən danışan dövlətimizin başçısı diqqətə çatdırdı ki, dövrə müvafiq olaraq dövlət xərclərinə yenidən baxılır, büdcəyə qənaət edilir, cari xərclər süni şəkildə şişirdilməməsi üçün şəffaflığın təmin edilməsi prosesi həyata keçirilir, hökumət əlavə gəlir mənbələri tapmaq üçün fəaliyyətini davam etdirir. Prezident xalq qarşısında hesabat verməklə bərabər, gələcək üçün “Yol xəritəsi”ni də müəyyənləşdirdi”, - deyə T.Cəfərova vurğulayıb.
Onun sözlərinə görə, indiki həssas məqamda xalqın ehtiyacını ödəmək və makroiqtisadi sabitliyin təmin etmək məqsədilə işini itirən 600 min nəfərə dövlət dəstəyi reallaşdırılıbb, işsizlər qeydiyyata alınıb, ünvanlı sosial yardım alan ailələrin sayı 70 mini ötüb. Prezident müşavirədə diqqətə çatdırdı ki, ötənilki kimi, 2020-ci il də çox dərin və geniş islahatlar ili olacaq. İrəli getmək, inkişaf etmək üçün islahatlar mütləq lazımdır. Məhz aparılan islahatların nəticəsidir ki, Azərbaycan həm siyasi müstəvidə, iqtisadi sahədə, həm də sosial problemlərin həllində müsbət nəticələr əldə edib. Pandemiya bir daha onu göstərdi ki, uğurlu inkişaf üçün iqtisadiyyat dayanıqlı olmalıdır. Dövlətimizin başçısı vurğuladı ki, siyasi islahatların aparılması bundan sonra da ölkəmizin imkanlarını daha da genişləndirəcək. Azərbaycan bundan sonra da demokratik inkişaf istiqamətində önəmli addımlar atacaq. Siyasi və iqtisadi islahatlar paralel aparılarkən doğrudan da böyük uğurlara nail olmaq mümkündür.
Deputat bildirib ki, Prezident İlham Əliyev atılan addımların, həyata keçirilən islahatların məhz xalqın, vətəndaşların rifahı üçün edildiyini diqqətə çatdırdı. Amma təəssüf ki, ölkəmizin inkişafını bəzi qüvvələrin gözü götürmür, çətin vəziyyətdən istifadə edərək çaşqınlıq yaratmaq istəyirlər. Amma onlar dövlətçiliyimizə ziyan vura bilməyəcəklər. Qeyd edilib ki, bu gün siyasi dialoqdan imtina edənlərin 1990-cı illəri xatırlaması kifayətdir. Dövlətə xəyanət, torpaqların işğalı, vətəndaş müharibəsi siyasi yox, düşərgə təmsilçilərinin hakimiyyətdə olduğu dövrün təzahürləri idi. Bu qruplaşma ölkədə xaos, anarxiya, korrupsiya yaratmışdı. Günün reallığıdır ki, hakimiyyət tərəfindən siyasi dialoq başladılıb və bunu sonuncu parlament seçkiləri də açıq-aydın göstərdi. Azərbaycanda parlament tarixində ilk dəfədir ki, müxalif partiyaların üzvləri Milli Məclisin və komitələrin rəhbərliyində yer alırlar.
T.Cəfərova deyib: “Azərbaycan Prezidenti vacib strategiyaları açıqlayaraq, növbəti illərdə Azərbaycanın inkişaf istiqamətləri, prioritetləri, xalqın rifahının yüksəldilməsi, innovativ idarəetmə sahələrində hədəfləri müəyyənləşdirdi. Dövlətimizin başçısı sosial, iqtisadi, maliyyə, makroiqtisadi sabitlik, təhlükəsizlik və digər vacib məsələlərin daha rentabelli, sistemli, nəticəyəyönümlü olması barədə “Yol xəritəsi”nin trayektoriyasını, bir sözlə, dövlət siyasətinin strategiyasını açıqlamış oldu”.
Bölmənin digər xəbərləri
