Bakı, 2 noyabr, AZƏRTAC

Noyabrın 8-i bütün Azərbaycan üçün təqvimin ən şanlı günü və otuz ilə yaxın həsrətində olduğumuz Zəfərin nişanəsidir. Bu, bizim üçün çətin, amma şərəfli bir yolun sonunda əldə olunmuş tarixi nailiyyətdir. Prezident, Müzəffər Ali Baş Komandan İlham Əliyevin rəhbərliyində qalib Azərbaycan Ordusu düşməndən fərqli olaraq beynəlxalq ictimaiyyətə ədalət dərsi verərək BMT Təhlükəsizlik Şurasının dörd qətnaməsinin təkbaşına icra edilməsinin mümkünlüyünü bütün dünyaya sübut etdi. Ərazilərimiz işğaldan azad olunduqca o şanlı günlər də Zəfər tariximizə bir-bir yazıldı. Bu, uzun və mürəkkəb bir yolun gözlənilən təbii nəticəsi idi. Heç şübhəsiz ki, torpaqlarımızın işğaldan azad edilməsi missiyası bütün dövrlərdə dövlət siyasətinin başlıca hədəfi olaraq prioritetlərimizi müəyyənləşdirən qüvvə olub. Bu missiyanın əsası Ulu Öndər Heydər Əliyevin uzaqgörən siyasəti ilə qoyulmuş, ona özüm qədər inanıram dediyi Prezident İlham Əliyevin müdrik addımları ilə davam etdirilərək bizi qələbəyə çatdırdı. Qətiyyətli iradəyə sahib liderin rəhbərliyi ilə güclü ordu quruculuğu siyasəti, çoxtərəfli beynəlxalq əlaqələrin qurulması və dövlət-xalq birliyinin təmin olunması bu Zəfəri şərtləndirən mühüm amillərdəndir.

Bu fikirləri AZƏRTAC-a açıqlamasında politoloq Aytən Qurbanova söyləyib.

Politoloq bildirib ki, işğal dövründə torpaqların danışıqlar yolu ilə azad olunması dövlət siyasətinin prioritet istiqaməti idi, amma Azərbaycanın ərazi bütövlüyünü hədəf alan ədalətsiz şərtlərin irəli sürülməsi də hər fürsətdə açıq şəkildə ifadə edilirdi. Məhz bu nöqteyi-nəzərdən yanaşdıqda, paralel olaraq güclü ordu quruculuğu siyasətinin həyata keçirilməsi Prezident İlham Əliyevin uzaqgörən siyasətinin bariz nümunəsidir. Belə ki, İkinci Qarabağ müharibəsi göstərdi ki, Azərbaycan Ordusu verilən bütün tapşırıqları yüksək səviyyədə icra etmək qabiliyyətinə malik olan vətənpərvərlik ruhunda tərbiyə edilmiş şəxsi heyətə, innovativ yanaşmalara və müasir hərbi-texniki təchizata sahibdir.

“Dövlətimizin başçısı ordu quruculuğunun məqsədyönlü şəkildə aparılan siyasətin tərkib hissəsi olduğunu aydın şəkildə ifadə edərək bildirmişdi ki, “Bu gün Azərbaycan Ordusu dünya miqyasında güclü ordular sırasındadır. Mən bunu dəfələrlə deyirdim, hərbçilərlə görüşlər əsnasında, digər tədbirlərdə deyirdim, bu gün biz elə bir güclü ordu yaratmışıq ki, istənilən vəzifəni icra edə bilərik. Ona görə ordumuzun müasir texnika ilə təchizatı, müntəzəm olaraq keçirilmiş təlimlər, ordumuzun döyüş potensialının gücləndirilməsi, hərbi sənayenin yaradılması və idxaldan müəyyən dərəcədə asılılığın azaldılması - bütün bunlar məqsədyönlü şəkildə apardığımız siyasətin tərkib hissəsi idi”. Onu da qeyd edək ki, Azərbaycan Respublikasının ərazilərinin işğaldan azad edilməsi və konstitusion əsaslarının qorunması uğrunda aparılan hərbi əməliyyatlar zamanı xüsusi igidlik və şücaət göstərmiş minlərlə hərbi qulluqçumuz Müzəffər Ali Baş Komandan İlham Əliyevin müvafiq sərəncamları ilə müxtəlif orden və medallarla təltif edilib. Şəhid ailələri və qazilərimiz hər zaman dövlət qayğısı ilə əhatə olunur”, - deyə Aytən Qurbanova qeyd edib.

Onun sözlərinə görə, döyüş meydanında qazanılan Qələbənin diplomatiya müstəvisində davam etdirilməsi uzun illərdir həyata keçirilmiş uğurlu xarici siyasətin məntiqi nəticəsidir. Azərbaycan Respublikası balanslı xarici siyasət prioritetlərinə uyğun olaraq heç bir hərbi-siyasi bloklaşmada təmsil olunmur. Qoşulmama Hərəkatına üzvlüyümüz bu mövqeyi daha aydın şəkildə ifadə etməklə yanaşı, beynəlxalq əlaqələrin çoxtərəflilik prinsipi əsasında formalaşdırılması üçün mühüm platforma yaratmış oldu. Xüsusilə də 44 günlük Vətən müharibəsi dövründə bu Hərəkata üzv olan ölkələrin Azərbaycanın ərazi bütövlüyünə və suverenliyinə münasibətdə verdikləri dəstək istisnasız olaraq qeyd edilməlidir. Azərbaycan Türk və İslam dünyasının aparıcı dövlətlərindən biri olmaqla yanaşı, Qərb üçün də önəmli enerji tərəfdaşıdır. Eləcə də Azərbaycan müasirliyin və ənənəviliyin vəhdətini təcəssüm etdirən bir dövlət olaraq sivilizasiyalar arasında mühüm körpü rolunu oynayır. Belə bir şəraitdə Azərbaycanın ərazi bütövlüyünün bərpa edilməsi istiqamətində atdığı addımlar təbii ki, dost və strateji tərəfdaş olan dövlətlər tərəfindən də birmənalı şəkildə dəstəklənir.

“Bizi Qələbəyə aparan yolda dövlət-xalq birliyinin təmin olunması isə ən vacib amil olaraq mütləq şəkildə qeyd edilməlidir. Müzəffər Ali Baş Komandanın döyüş əmri ilə sadəcə minlərlə insan könüllü olaraq cəbhəyə yola düşmədi, bütün dünya azərbaycanlıları bir oldu və “dəmir yumruq” kimi birləşdi. Bu, Azərbaycan xalqının öz liderinə olan sonsuz etimadının və Vətən sevgisinin aydın ifadəsi idi. Biz bunu bacardıq, Ali Baş Komandanın rəhbərliyində Xocalıda, Başlıbeldə, Bağanıs Ayrımda və işğal altındakı bütün torpaqlarımızda zülmə məruz qalaraq şəhid olmuş günahsız soydaşlarımızın qisasını aldıq. Ona görə də bu Zəfər bizim üçün çox dəyərlidir və müqəddəsdir”, - deyə A.Qurbanova vurğulayıb.