DÜNYA AZƏRBAYCANLILARININ II QURULTAYI İLƏ BAĞLI BÜTÜN TEXNİKİ-TƏŞKİLATİ MƏSƏLƏLƏR HƏLL OLUNMUŞDUR
Bu məlumatı Xarici Ölkələrdə Yaşayan Azərbaycanlılarla İş üzrə Dövlət Komitəsinin sədri Nazim İbrahimov martın 9-da qurultaya hazırlıqla bağlı keçirdiyi mətbuat konfransında vermişdir. Komitə sədri bildirmişdir ki, xarici ölkələrdə fəaliyyət göstərən Azərbaycan icmaların və birliklərin nümayəndələrinə, milliyyətcə azərbaycanlı olmayan, amma Azərbaycanı sevən, ölkəmizlə bağlı həqiqətlərin dünya ictimaiyyətinə çatdırılmasında fəal rol oynayan həmvətənlərimizə - ziyalılara, siyasi xadimlərə dəvətnamələr göndərilmişdir. Qurultayda 49 xarici ölkədən 600-ə yaxın nümayəndənin iştirakı gözlənilir. O cümlədən Rusiyadan 170 nəfər, Ukraynadan 60, Gürcüstandan 40, Türkiyədən 39, Almaniyadan 33, Qazaxıstandan 25, İsveçdən 20, Fransadan 15, ABŞ-dan 11, Böyük Britaniyadan 12, Kanadadan 10, Niderlanddan 10 nəfər nümayəndə gələcəkdir. Avstraliya, Birləşmiş Ərəb Əmirlikləri, Çexiya, Çin, Bolqarıstan, İsrail, İspaniya, İtaliya, Macarıstan, Misir, Polşa, Tacikistan, Türkmənistan, Yaponiya, Yeni Zelandiya, Yunanıstan, İslandiya və Tailanddan gələcək nümayəndələr dünya azərbaycanlılarının ali məclisində ilk dəfə iştirak edəcəklər. Bundan əlavə, 40-dan çox ölkədən Azərbaycan diasporunun inkişafında xidmətləri olan, milli maraqlarımızın qorunması işində fəal iştirak edən siyasi xadimlər, hökumət və parlament üzvləri, tanınmış alim və ziyalılardan ibarət 300-ə yaxın şəxs qurultaya qonaq qismində dəvət olunmuşlar.
Qurultayda Azərbaycan diasporunun indiki vəziyyətinə aid bir sıra məsələlər, Azərbaycan həqiqətlərinin, xalqımıza qarşı törədilmiş terror və soyqırımı əməlləri ilə bağlı faktların dünya ictimaiyyətinə çatdırılmasının yeni və daha müasir metodlarının hazırlanması, digər xalqların diaspor təşkilatları ilə əlaqələrin gücləndirilməsi məsələləri müzakirə olunacaqdır. Azərbaycan diasporunun fəaliyyət konsepsiyasının hazırlanması məqsədi ilə işçi qrupunun yaradılması, Azərbaycan və türk icmalarının birgə fəaliyyət strategiyasının işlənib hazırlanması məsələlərinə də baxılacaqdır.
Müzakirələrin nəticəsi olaraq sonda qətnamə, qurultay iştirakçıları adından Azərbaycan Prezidentinə, Dünya azərbaycanlılarına müraciətlər qəbul ediləcəkdir. Ermənistanın Azərbaycana təcavüzü ilə əlaqədar xüsusi bəyanatın, işğal olunmuş ərazilərimizdə Azərbaycanın tarixi abidələrinin və mədəni irsinin dağıdılması ilə bağlı beynəlxalq təşkilatlara müraciətin və digər sənədlərin qəbulu da gözlənilir.
Qurultaydan sonra qonaqların və nümayəndələrin Azərbaycanın müxtəlif bölgələrinə səfərləri planlaşdırılmışdır.
Bölmənin digər xəbərləri
