Dünya çempionatı: Azərbaycan güləşçisi bürünc medal görüşünə vəsiqə qazanıb
Bakı, 23 oktyabr, AZƏRTAC
Azərbaycanın yunan-Roma güləşçisi İlkin Qurbanov Serbiyanın Novi Sad şəhərində təşkil olunan U-23 dünya çempionatında bürünc medal görüşünə çıxacaq.
AZƏRTAC xəbər verir ki, 60 kiloqram çəki dərəcəsində çıxış edən idmançı təsəlliverici qarşılaşmada türkiyəli Mert İlbarsa ilk xal prinsipinə əsasən (1:1) qalib gəlib.
O, üçüncü yer uğrunda görüşdə özbəkistanlı Mehrac Bəhramovla üz-üzə gələcək.
Bu gün mübarizəyə qoşulan Azərbaycanın qadın güləşçiləri Gültəkin Şirinova (55 kiloqram) və Ruzanna Məmmədova (65 kiloqram) təsnifat mərhələsində, Nərgiz Səmədova (57 kiloqram) isə 1/8 finalda rəqiblərinə məğlub olublar.
Yarımfinallar Bakı vaxtı ilə saat 19:00-da, medallar uğrunda görüşlər isə 20:00-da başlayacaq.
Qeyd edək ki, U-23 dünya çempionatında Elmir Əliyev (55 kiloqram) və Ziya Babaşov (63 kiloqram) fəxri kürsünün ən yüksək pilləsinə qalxıblar, Ruslan Nurullayev (72 kiloqram) isə bürünc medal qazanıb. Hazırda aktivində iki qızıl medal olan yunan-Roma güləşi üzrə Azərbaycan millisi bu nəticə ilə yeni rekorda imza atıb.
Bölmənin digər xəbərləri
