Dünya Turizm Təşkilatı FITUR beynəlxalq sərgisi çərçivəsində silsilə tədbirlər keçirəcək
Bakı, 5 yanvar, AZƏRTAC
Yanvarın 28-dən fevralın 1-dək Madriddə FITUR beynəlxalq turizm sərgisi təşkil olunacaq. Sərgi çərçivəsində Dünya Turizm Təşkilatının (DTT) silsilə tədbirlərinin keçirilməsi nəzərdə tutulub.
AZƏRTAC təşkilatın saytına istinadla xəbər verir ki, Azərbaycanı FITUR beynəlxalq sərgisində Mədəniyyət və Turizm Nazirliyi təmsil edəcək.
Sərginin birinci günündə DTT-nin XI “Mükəmməllik və yenilik” mükafatının təqdimat mərasimi olacaq. Silsilə tədbirlərə DTT-nin birinci alış-veriş turizm konfransı, qoşulmuş üzvlər şurasının 39-cu iclası, DTT-nin birgə təşkilatçılığı ilə Afrika üzrə VI turizm investisiya və biznes forumu, Afrika və Orta Şərq ölkələrinin turizm nazirlərinin görüşü, turizm xidmətlərində hamı üçün texnologiya və digər tədbirlər daxildir.
Turizm sektorunda davamlı tələbat və istehsal məsələlərinə dair milli və beynəlxalq təşəbbüsləri əhatə edən “FITUR GREEN 2015” nəşri yanvarın 28-dən 30-dək “dəyirmi masa”lar, təqdimatlar və seminarlar formatında təqdim olunacaq.
Bu il FITUR fəaliyyətinin 35 illiyini qeyd edir.
Bölmənin digər xəbərləri
