AZƏRTAC Dünya Səhiyyə Təşkilatının saytına istinadla xəbər verir ki, dünyada indiyədək quş qripinə yoluxmuş 208 adamdan 115-i vəfat etmişdir. 2003-cü ildən onlarca ölkədə insanların quş qripinə yoluxması qeydə alınmışdır. Vyetnamda yaranmış H5N1 virusunun təsirinə təkcə Çin, İndoneziya, İraq, Kamboca, Misir, Türkiyə, Tailand deyil, bir sıra Avropa ölkələri də məruz qalmışlar. Bu il həmin virus Azərbaycanda da aşkar edilmişdir. Quş qripinə axırıncı yoluxma Cibutidə (Afrika) qeydə alınmışdır. İlin əvvəlindən dünyada bu xəstəliyə 64 nəfər yoluxmuş və onların 34-ü vəfat etmişdir.
Alimlərin fikrincə, infeksiyanın yayılmasında köçəri quşlar, ilk növbədə, Çin ilə Rusiyanın Uzaq Şərq regionları arasında uçan quşlar başlıca rol oynayır. Bu infeksiyaya bütün quşların yoluxduğu güman edilsə də, bəzi quşlar xəstəliyə daha dözümlüdür. Virus, adətən, quşlardan və donuzlardan savayı, digər canlılara keçmir. DST-nin məlumatına görə, son 8 ildə xəstəlik 150-200 milyon quşu məhv etmişdir.
