Dünyanı məlahətli səsi ilə fəth edən insan – Şaban Məmmədov
Tbilisi, 21 iyun, AZƏRTAC
Qaranlıqdan musiqili dünyaya baxış. Bəli onun dünyasını məhz bu cür adlandırmaq olar.
Haqqında söz açdığımız insan Gürcüstanın Marneuli rayonunda yaşayan, gözdən əlil, bir neçə beynəlxalq müsabiqənin qalibi, gənc müğənni Şaban Məmmədovdur.
Şaban Məmmədov hələ körpə ikən həkimlərin səhvi, məsuliyyətsizliyi üzündən görmə qabiliyyətini tam olaraq itirib. Amma ailə sanki onun gələcəyini görürmüş kimi, onun gələcəyinə inanırmış kimi körpə Şabana daim diqqət göstərib, qayğısını çəkib.
Hələ 5 yaşı olanda valideynləri ona balaca elektron pianino alıblar. Onun səsləndirdiyi ilk musiqi isə “Cücələrim” olub.
Şaban Məmmədov AZƏRTAC-a müsahibəsində deyib: “Mən dünyanın rənglərini görmürəm. Dünya mənim üçün qara və ağ rənglərdən ibarətdir. Mən notların necə yazıldığını, musiqi alətlərinin necə olduğunu da bilmirəm. Amma mənim musiqi dünyam rəngarəngdir. Ona görə ki, mən musiqini qəlbimlə duyuram və daxilimdən gələn duyğu ilə oxuyuram. Çalışıram mahnıları elə ifa edim, elə oxuyum ki, təkcə səsimi eşitməsinlər, içimdən gələn sevgini, sevinci duysunlar”.
Şabanın atası Faril Məmmədov deyir: “Biz onun üçün səsli oyuncaqlar alırdıq. Şaban həmin səslərlə əlindəkinin hansı oyuncaq olduğunu və necə səs çıxardığını bilirdi, ona uyğun müxtəlif hərəkətlər edir, səslər çıxarırdı. Beləcə biz onun musiqiyə həvəsinin artdığını gördük”.
Valideynləri onu təhsil almaq üçün “Candar” məktəbinə qoyurlar. Çox keçmədən məktəb direktoru onu Tbilisidəki gözdən əlil və zəif görənlər üçün dövlət məktəbinə aparmağı tövsiyə edir. Şaban orada təhsil alır və gürcü dilini öyrənir.
“Musiqi mənim həyatıma çox tez daxil oldu. Hələ 7 aylıq körpə uşaq olarkən həkimlərin səhlənkarlığı ucbatından məndə sepsis yaranıb. İlk əməliyyatımı edəndə 9 aylıq körpə olmuşam və görmə qabiliyyətimi də o zaman itirmişəm. Bundan sonra dünyanı səs vasitəsilə dərk etməyə çalışdım. Mənim üçün hər şey musiqi idi. İnsanların danışığını, quşların cingiltili səsini, yarpaqların xışıltısını, küləyin, yağışın səsini, hər şeyi ürəyimlə dinləyib müşahidə edirdim, hər səsdə melodiya axtarırdım”, - deyə Şaban Məmmədov bildirib.
Şaban həftənin beş gününü pansionat tipli məktəbdə musiqi məktəbində qalır. Orada “Brayl” əlifbası ilə musiqini daha dərindən öyrənməyə başlayır. Beləcə onun istedadı inkişaf edir.
Sonradan Marneulidə Mədəniyyət Evinə gələn Şaban burada musiqi qabiliyyətini daha da inkişaf etdirib. O, indi Azərbaycan, gürcü və digər xalqların bəstəkar və xalq mahnılarını məharətlə ifa edir.
Bu gün Şaban azərbaycanlıların təşkil etdikləri el şənliklərində, milli bayramlarda ifa etdiyi “Azərbaycan”, “Küçələrə su səpmişəm”, “Sarı gəlin”, “Ay Laçın”, “Ey əziz anam Azərbaycan”, “Şirin yuxun olaydım”, “Qal sənə qurban”, “Gəl ey səhər” mahnıları ilə hamını heyran edir. Dəfələrlə Marneulidə və Tbilisidə, eləcə də digər bölgələrdə keçirilən el şənliklərində oxuyan Şaban artıq müğənni kimi şöhrət qazanıb.
Onun geniş arenadakı ilk uğurlu çıxışı Gürcüstanda hər il keçirilən “Xalxuri” (Xalq mahnıları) festivalında olub. Şaban Məmmədovun gürcü dilində ifa etdiyi "Gecikmişdilər" mahnısı tamaşaçılar tərəfindən böyük alqışlarla qarşılanıb.
Gənc müğənninin uğurları bununla bitmir.
Şaban 2013-cü ildə Batumi Beynəlxalq Festivalının ən yüksək mükafatı olan Qran-Pri mükafatını qazanıb. O, bu yarışdan sonra Latviyaya dəvət olunub. Riqada keçirilən musiqi yarışmasında da Qran-Pri mükafatını alıb. Gənc müğənni 2015-ci ildə İstanbulda keçirilən musiqi festivalında Gürcüstana ilk mükafatı gətirən müğənni olub. Gənc ifaçı 2018-ci ildə Kiyevdə, 2023-cü ildə isə Çexiyada keçirilən “Praqa Milad Ulduzları 2023” XXXIX Beynəlxalq Xalq Rəqsləri və Musiqisi Müsabiqə-Festivalında Qran-Pri mükafatına layiq görülüb. 2024-cü ildə isə Fransada keçirilən yarışın qalibi olub.
Onun üçün ən yaddaqalan çıxışlardan biri isə Şuşada olub. Ş.Məmmədov milli geyimləri çox sevir. Gürcü ədəbiyyatını və tarixini də yaxşı bilir.
Qeyd edək ki, Şaban Məmmədov hazırda Marneuli Mədəniyyət Mərkəzinin solistidir.
Bölmənin digər xəbərləri
