Dünyanın aparıcı şəhərlərinin yer aldığı beynəlxalq reytinqlərdə Bakının da olması müsbət göstəricidir – RƏY
Bakı, 15 may, AZƏRTAC
Azərbaycanda son illərdə “ağıllı şəhər” və “ağıllı kənd” konsepsiyalarının tətbiqi istiqamətində mühüm işlər görülür. Bu proses həm Bakıda, həm də işğaldan azad olunmuş ərazilərdə geniş şəkildə həyata keçirilir. “Ağıllı kənd” modelinin ilk nümunələrindən biri Zəngilan rayonunun Ağalı kəndində yaradılıb. Burada bərpaolunan enerji mənbələrindən istifadə, yüksəksürətli internet infrastrukturu, “ağıllı” fermerlik sistemləri və kənd təsərrüfatının rəqəmsal idarə olunması kimi innovativ həllər tətbiq edilir.
Bu fikirləri AZƏRTAC-a açıqlamasında Rəqəmsal İnkişaf və Nəqliyyat Nazirliyinin İctimai Şurasının üzvü, informasiya texnologiyaları üzrə mütəxəssis Fərid Kazımov deyib.
“Bir neçə il əvvəl Ağalı kəndində “ağıllı kənd” modeli quruldu və bu layihə artıq beynəlxalq səviyyədə maraq doğuran nümunələrdən birinə çevrilib”, – deyə F.Kazımov vurğulayıb.
Onun sözlərinə görə, işğaldan azad olunmuş ərazilərdə yeni şəhər və kəndlərin sıfırdan qurulması Azərbaycana unikal imkan yaradır. Belə ki, mövcud şəhərlərin sonradan “ağıllı şəhər” modelinə uyğunlaşdırılmasından fərqli olaraq, burada bütün infrastruktur “ağıllı şəhər” konsepsiyasına uyğun şəkildə əvvəlcədən planlaşdırılır.
Ekspert qeyd edib ki, bu yanaşma müxtəlif istiqamətlərdə özünü göstərir. Bakıda da elektrik enerjisinin idarə olunması, şəhər nəqliyyatının təşkili və digər kommunal xidmətlər sahəsində “ağıllı” texnologiyaların tətbiqi genişlənir. “Bakı böyük və mürəkkəb şəhər təsərrüfatına malikdir. Buna baxmayaraq, burada “ağıllı şəhər” həllərinin tətbiqi istiqamətində mühüm addımlar atılır”, - deyə o əlavə edib.
F.Kazımov bildirib ki, Bakı artıq beynəlxalq “ağıllı şəhər” reytinqlərində də yer almağa başlayıb. Bu cür siyahılara daxil olmaq özü də mühüm göstərici hesab olunur.
“Dünyanın aparıcı şəhərlərinin yer aldığı beynəlxalq reytinqlərdə, o cümlədən “IESE Cities in Motion Index” kimi nüfuzlu siyahılarda Bakının adının çəkilməsi artıq müsbət göstəricidir. Çünki əvvəllər bəzi reytinqlərdə, ümumiyyətlə şəhərimizin adı yer almırdı. Hazırda isə Bakı həm “IESE Cities in Motion Index” reytinqində, eləcə də “QS Best Student Cities 2026” reytinqində 117-ci yerdə qərarlaşıb. Bu reytinqlərə şəhərlərin adının düşməsi belə nailiyyətdir, çünki bir sıra keyfiyyətlər nəzərə alınır. Həmçinin “ağıllı şəhər” komponentləri xüsusi olaraq nəzərə alınır. Qeyd edim ki, sonuncu hesabatda Bakı bu reytinqdə 9 pillə irəliləyib”, – deyə ekspert bildirib.
Onun sözlərinə görə, London və digər qabaqcıl şəhərlərin liderlik etdiyi belə reytinqlərdə Bakının da təmsil olunması ölkədə rəqəmsal transformasiya və “ağıllı şəhər” həllərinin inkişaf etdiyini göstərir.
Mütəxəssis hesab edir ki, Azərbaycanda bərpaolunan enerji və rəqəmsal transformasiya istiqamətində həyata keçirilən layihələr yaxın illərdə ölkənin beynəlxalq “ağıllı şəhər” reytinqlərində daha da irəliləməsinə şərait yaradacaq.
O qeyd edib ki, Füzuli, Ağdam və digər şəhərlərdə həyata keçirilən layihələr, eləcə də “ağıllı kənd” təşəbbüsləri gələcəkdə Azərbaycanın bu sahədə uğurlu nümunə kimi təqdim olunmasına imkan verəcək.
“Əminəm ki, BMT-nin Ümumdünya Şəhərsalma Forumuna (WUF13) gələn qonaqlar da Azərbaycanın bu istiqamətdə əldə etdiyi nailiyyətlərlə yaxından tanış olacaqlar”, – deyə Fərid Kazımov bildirib.
Müxbir – Pərvanə Qafarova
Bölmənin digər xəbərləri
