SİYASƏT
Əbu-Dabidə Azərbaycanın Müstəqillik Günü münasibətilə tədbir keçirilib
Bakı, 25 may, AZƏRTAC
Birləşmiş Ərəb Əmirliklərinin (BƏƏ) paytaxtı Əbu-Dabi şəhərindəki “Rixos Marine” otelində 28 May - Azərbaycan Respublikasının Müstəqillik Günü münasibətilə tədbir keçirilib.
AZƏRTAC xəbər verir ki, Azərbaycan Respublikasının Dövlət Himni səsləndirilib, tədbirin keçirildiyi otelin binası Azərbaycanın dövlət bayraqları ilə bəzədilib.
Azərbaycanın BƏƏ-dəki səfirliyi və Dubaydakı baş konsulluğunun birgə təşkilatçılığı ilə keçirilən tədbirdə çıxış edən ölkəmizin Əbu-Dabidəki səfiri Elçin Bağırov BƏƏ-nin dövlət naziri Xəlifə Şahin Əl Mərarı, Bakıdan dəvət olunmuş qonaqları, müxtəlif ölkələrin diplomatik korpuslarının rəhbərlərini və nümayəndələrini, yerli ictimaiyyətin və Azərbaycan diasporunun təmsilçilərini salamlayıb.
Səfir çıxışında müsəlman Şərqində ilk demokratik respublika olan Azərbaycan Xalq Cümhuriyyətinin tarixindən bəhs edib. O vurğulayıb ki, SSRİ-nin süqutundan sonra yenidən dövlət müstəqilliyini əldə edən ölkəmiz Azərbaycan xalqının Ümummilli Lideri Heydər Əliyevin müdrik siyasəti sayəsində öz suverenliyini qoruyub saxlayıb, dünya birliyinin ən sürətlə inkişaf edən və beynəlxalq nüfuza malik olan üzvünə çevrilib. Diplomatımız müstəqilliyin ilk illərində bu il anadan olmasının 100 illik yubileyinin geniş şəkildə qeyd edildiyi Ulu Öndərin misilsiz xidmətlərindən, Azərbaycanın əldə etdiyi uğurlardan ətraflı bəhs edib.
E.Bağırov vurğulayıb ki, Ulu Öndər Heydər Əliyevin müdrik siyasətini davam etdirən Azərbaycan Prezidenti İlham Əliyevin səyləri nəticəsində qazanılan uğurlar daha da möhkəmlənib, onun rəhbərliyi altında şanlı Ordumuz 30 ilə yaxın Ermənistanın işğalı altında olmuş torpaqları azad edib, ölkəmizin ərazi bütövlüyü təmin olunub. O əlavə edib ki, bu gün həmin ərazilərdə geniş bərpa-quruculuq işləri aparılır, eyni zamanda, Azərbaycan Cənubi Qafqaz regionunda dayanıqlı sülhə nail olmaq istiqamətində səylərini davam etdirir.
Tədbirin sonunda azərbaycanlı incəsənət ustaları konsert proqramı ilə çıxış edib, qonaqlara milli mətbəximizin təamlarından ibarət süfrə açılıb.