ƏDLİYYƏ NAZİRLİYİ MƏTBUAT XİDMƏTİNİN MƏLUMATI
İrqçilik və dözümsüzlüyə qarşı Avropa Komissiyasının nümayəndə heyəti Bakıda səfərdədir.
Martın 27-də ədliyyə nazirinin müavini Toğrul Musayev Avropa Komissiyasının Azərbaycan üzrə məruzəçisi xanım Yeva Smit Asmussenin başçılıq etdiyi həmin nümayəndə heyətini qəbul etmişdir.
Komissiyanın fəaliyyətinin əhəmiyyətini yüksək qiymətləndirən, Avropa Şurasının üzvü olan hər bir ölkənin irqçilik və dözümsüzlük problemlərinə xüsusi diqqət yetirilməsinin zəruri olduğunu qonaqların nəzərinə çatdıran nazir müavini Azərbaycan Respublikasının Prezidenti cənab Heydər Əliyevin rəhbərliyi ilə ölkəmizdə aparılan demökratik hüquqi islahatlardan söz açmışdır. Toğrul Musayev dövlətimizin irqi ayrı-seçkiliyin bütün formalarının ləğv edilməsi, Soyqırımı, aparteid cinayətlərinin qarşısının alınması və onların cəzalandırılması, milli azlıqların müdafiəsi məsələlərinə həsr olunmuş bir sıra mühüm beynəlxalq konvensiyalara, o cümlədən İnsan hüquq və əsas azadlıqlarının müdafiəsi haqqında Avropa Konvensiyasına qoşulduğunu bildirmiş, Azərbaycanın Konstitusiyasında və qanunlarında irqindən, milliyətindən, dinindən, dilindən, cinsindən, mənşəyindən asılı olmayaraq hər bir kəsin bərabər hüquqlara malik olmasının təsbit edildiyini və onların real təminatının mövcudluğunu vurğulamışdır.
Ölkəmizin dünya birliyinə sıx inteqrasiyasını xatırladan T.Musayev xalqımızın tarixən beynəlmiləlçilik prinsiplərinə sadiq olduğunu söyləmiş, həmin ənənələrin bu gün də uğurla davam etməsini, Azərbaycanda gedən demokratik proseslərin və yeni mütərəqqi qanunların qəbul olunmasını xalqımızın dünyagörüşünün, adət-ənənəsinin və fəlsəfi baxışlarının təzahürü kimi dəyərləndirmişdir.
O, həmçinin, hazırda Azərbaycanda bir sıra dini təriqətləri təmsil edən 400-dək təşkilatın, eləcə də müxtəlif dini tədris mərkəzlərinin fəaliyyət göstərdiklərini bildirmiş, ölkəmizdə yaşayan azsaylı qrupların əsas hüquq və azadlıqlarının, o cümlədən təhsil, mədəniyyət, dini etiqad və digər hüquqlarının dövlət tərəfindən təmin olunmasını vurğulamışdır.
Görüşdə 10 ildən artıq davam edən Ermənistan-Azərbaycan, Dağlıq Qarabağ münaqişəsi nəticəsində torpaqlarımızın 20 faizinin işğal edilməsi, ölkəmizdə bir milyondan artıq qaçqın və məcburi köçkün olması qonaqların diqqətinə çatdırılmış, iki əsr boyu azərbaycanlılara qarşı yeridilən soyqırım, deportasiya və işğal siyasətinin intensivliyinin bu gün də zəifləmədiyi, XX əsrin axırlarında törədilmiş Xocalı soyqırımı nəticəsində yüzlərlə günahsız insanın yalnız azərbaycanlı olduğuna görə vəhşicəsinə öldürüldüyü bildirilmişdir.
T.Musayev martın 26-da dövlətimizin başçısı cənab Heydər Əliyevin 31 mart - azərbaycanlıların soyqırımı münasibətilə xalqa müraciətini qonaqların nəzərinə çatdıraraq, ümumbəşəri dəyərlərin üstünlüyünü qəbul edən Azərbaycanın irqçiliyə, soyqırım siyasətinə qarşı barışmaz mövqedə olduğunu qeyd etmişdir.
Nazir müavini komissiya üzvlərinə regiondakı vəziyyəti öyrənərək, öz təhlillərində bu məsələləri nəzərdən qaçırmamağı tövsiyə etmişdir.
Səmimi qəbula görə təşəkkürlərini bildirən ekspertlər Azərbaycanda aparılan demokratik islahatlardan xəbərdar olduqlarını, ölkəmizdə insan hüquqlarının müdafiəsinin və həyata keçirilməsinin yüksək səviyyəsindən və cəmiyyətdə hökm sürən davamlı inkişafdan məmnun qaldıqlarını, qəbul olunmuş yeni mütərəqqi qanunların insan haqqlarının təmin olunmasına yönəldiyini və bütövlükdə qanunvericiliyimizin irqçilik və dözümsüzlük zəminində hər hansı problemlərin yaranmasına imkan vermədiyini xüsusilə vurğulamışlar.
Ekspertlər eyni zamanda, ölkəmizdə Ombudsman təsisatının bərqərar olunmasının demokratik hüquqi dövlətin təməl prinsiplərinə cavab verdiyini və vətəndaş cəmiyyətinin inkişafına xidmət göstərdiyini məmnuniyyətlə qeyd etmişlər.
Bölmənin digər xəbərləri
