ƏDLİYYƏ NAZİRLİYİNDƏ QƏBUL
Ədliyyə naziri Fikrət Məmmədov Birləşmiş Millətlər Təşkilatının Azərbaycan Respublikasındakı Rezident Əlaqələndiricisi və BMT-nin İnkişaf Proqramının ölkəmizdəki Rezident Nümayəndəsi cənab Marko Borzottini qəbul etmişdir.
Azərbaycanda aparılan hüquqi islahatlar, o cümlədən ədliyyə sisteminin islahatı barədə qonağa ətraflı məlumat verən nazir, bu islahatların həyata keçirilməsində nüfuzlu beynəlxalq təşkilatlarla, xüsusilə BMT ilə əməkdaşlığın, birgə həyata keçirilən layihələrin mühüm rolunu qeyd etmiş, ölkəmizin Prezidenti cənab Heydər Əliyevin bu sahəyə xüsusi diqqətinin təzahürü olaraq, Azərbaycan Respublikası hökuməti ilə BMT-nin İnsan hüquqları üzrə Ali Komissarlığı arasında imzalanmış “İnsan hüquqlarının təşviq edilməsi və müdafiəsi üçün imkanların və infrastrukturun gücləndirilməsi” layihəsinin əhəmiyyətini vurğulamışdır.
Səmimi qəbula görə minnətdarlıq edən, Azərbaycanda aparılan hüquqi islahatlardan xəbərdar olduğunu söyləyən BMT təmsilçisi ölkənin demokratik prinsiplərə sadiqliyindən, insan hüquqlarının daha etibarlı təmin edilməsinə xidmət göstərən yeni müstəqil məhkəmə hakimiyyətinin formalaşmasından məmnun qaldığını bildirdi.
Görüşdə insan potensialından istifadə, narkotiklərin qanunsuz dövriyyəsinə qarşı mübarizə və digər sahələrdə BMT ilə Azərbaycan Respublikasının birgə əməkdaşlığının müsbət nəticələrindən razılıqla bəhs olunmuş, əməkdaşlığın yeni istiqamətləri barədə faydalı fikir mübadiləsi aparılaraq konkret məsələlər üzrə razılıq əldə edilmişdir.
Bölmənin digər xəbərləri
