“EKO - 2010” GƏNCLƏR KOALİSİYASININ MİLLİ MƏTBUAT GÜNÜ İLƏ ƏLAQƏDAR KEÇİRDİYİ MƏQALƏ MÜSABİQƏSİ YEKUNLAŞMIŞDIR
Bakı, 19 iyul (AZƏRTAC). “EKO - 2010” Gənclər Koalisiyasının “Ekologiya ili” çərçivəsində həyata keçirdiyi silsilə tədbirlərin davamı olaraq 22 iyul - Milli Mətbuat Günü ilə əlaqədar elan etdiyi jurnalistlərin məqalə müsabiqəsi artıq yekunlaşmışdır. Yaxın vaxtlarda qaliblərin adları açıqlanacaqdır. Müsabiqə qalibləri “EKO - 2010” Gənclər Koalisiyasının “Yaşıl Turizm Hədəfimizdir” adlı layihəsi çərçivəsində iyul ayının 26-dan başlayaraq Xaçmaz rayonunda təşkil olunacaq “Jurnalistlərin Yay Məktəbi”ndə iştirak edəcəklər.
Qeyd edək ki, hazırda müsabiqə qaliblərini müəyyənləşdirmək üçün yaradılan komissiyaya 31 məqalə təqdim olunub.
Müsabiqə Heydər Əliyev irsi və Azərbaycanda ekoloji siyasət, ekologiyanın qorunmasında və ekoloji təbliğatda KİV-lərin rolu və digər mövzular üzrə keçirilib.
Qaliblər “Jurnalistlərin Yay Məktəbi” müddətində həmin regionda ətraf mühit, ekologiyanın qorunması ilə bağlı aparılan işlərlə yaxından tanış olacaq, müvafiq mövzularda yazılar hazırlayacaqlar və həmin yazılar jurnalistlərin çalışdıqları mətbuat orqanında nəşr olunacaqdır. Bu da “Yaşıl Turizm Hədəfimizdir” layihəsinin ən vacib şərtlərindən biridir.
Bölmənin digər xəbərləri
