Bakı, 14 aprel (AZƏRTAC). Məlum olduğu kimi, Azərbaycan Respublikası Prezidenti İlham Əliyevin 2006-cı il 28 sentyabr tarixli Sərəncamı ilə təsdiq edilmiş “Azərbaycan Respublikasında ekoloji vəziyyətin yaxşılaşdırılmasına dair 2006-2010-cu illər üçün Kompleks Tədbirlər Planı” və 2009-cu il 14 aprel tarixli Fərmanı ilə təsdiq edilmiş “Azərbaycan Respublikası regionlarının 2009-2013-cü illərdə sosial-iqtisadi inkişafı Dövlət Proqramı”nda nəzərdə tutulmuş tədbirlərin həyata keçirilməsi məqsədi ilə dövlət orqanlarının, o cümlədən ARDNŞ-in qarşısında mühüm vəzifələr qoyulmuşdur. Həmin vəzifələrin yerinə yetirilməsi üçün Azərbaycan Respublikası Dövlət Neft Şirkəti özünün “Ekoloji siyasət”ini müəyyən etmiş, ekoloji vəziyyətin yaxşılaşdırılması sahəsində geniş “Tədbirlər plan”ı işləyib hazırlamışdır. Hazırda bu plan ardıcıl olaraq yerinə yetirilir.

Uzun müddət ərzində Azərbaycanda neftin ekoloji tələblərə lazımınca əhəmiyyət verilmədən hasil olunması mədən sahələrində çoxsaylı ekoloji problemlər yaratmışdır. Həmin problemlərin aradan qaldırılması zərurəti digər tədbirlərlə yanaşı, ARDNŞ-in iştirakı ilə yeni birgə müəssisələrin yaradılması və bu işlərə xarici investorların cəlb olunması məsələsini aktuallaşdırmışdır. Bu baxımdan ARDNŞ və dünyada tanınmış “Lancer” Environmental Consultinq Şirkətinin təsisçiliyi ilə 2006-cı ilin martında yaradılmış “Ekol Mühəndislik Xidmətləri” Qapalı Səhmdar Cəmiyyətinin (QSC) fəaliyyəti xüsusi qeyd olunmalıdır. Ötən müddətdə QSC sənaye-çirkab sularının təmizlənməsi, tutumların (çənlərin, hovuzların və s.) təmizlənməsi, ekoloji monitorinq işlərinin aparılması, ekoloji texniki-normativ sənədlərin işlənib hazırlanması və laboratoriya xidmətlərinin göstərilməsi sahələrində uğurlu nəticələrə nail olmuşdur.

Heydər Əliyev adına Bakı və “Azərneftyağ” neft emalı zavodlarında sənaye-çirkab sularının təmizlənməsi, “Bibiheybətneft” NQÇİ-nin mədən ərazilərində neftlə çirklənmiş torpaqların təmizlənməsi, habelə digər sahələrdə neft şlamlarının emalı və zərərsizləşdirilməsi, gölməçələrin qurudulması, torpaqların rekultivasiyası və remediasiyası, yaşıllıqların salınması, torpağın profilinin çıxarılması və analizinin aparılması, bağçılıq təsərrüfatının yaradılması, suvarma sistemlərinin quraşdırılması və s. ekoloji yönümlü tədbirlərdə “Ekol”un əməyi qeyd olunmalıdır. Müəssisə artıq ARDNŞ-in 50-dən artıq idarə və təşkilatına həmin istiqamətlərdə yüksək səviyyəli ekoloji xidmət göstərir. Ötən dövrdə şirkətin maddi-texniki bazası gücləndirilmişdir. Sənaye-çirkab sularının təmizlənməsinin, neft şlamının emalının və zərərsizləşdirilməsinin müasir texnologiyalarla həyata keçirilməsi üçün İsveçrənin “Alfa-Laval” şirkətinin müasir tipli, məhsuldarlığı saatda 30 kubmetr olan 2 dekantor-şeker modul qurğusu və Almaniyanın “Facet” şirkətinin gücü saatda 1200 kubmetr olan separator qurğusu alınaraq Heydər Əliyev adına Bakı Neft Emalı Zavodunda quraşdırılmışdır. “Ekol” QSC, həmçinin 28 minik maşını, 6 yük maşını, 17 xüsusi texnika, ən müasir nasos, avadanlıq və s. vasitələrlə təchiz olunmuşdur. 2008-ci ildə müasir standartlara cavab verən parafin təmizləmə qurğusunun tikinti-quraşdırma işlərinin başa çatdırılaraq istifadəyə verilməsi QSC-nin əldə etdiyi mühüm nailiyyətlərdən biridir. Hazırda Heydər Əliyev adına Bakı Neft Emalı Zavodunda “BP Exploreyşn (Kaspian Sİ)” LTD-dən müqavilə əsasında qəbul edilən ərsin parafinin təmizlənmə prosesi uğurla aparılır və bu istiqamətdə işlər davam etdirilir.

Ötən illərdə QSC-nin beynəlxalq əlaqələri genişlənmiş, “Ekol” bir sıra ölkələrdə özünə tərəfdaşlar tapmışdır. Bu sırada Özbəkistanın “Özbəkneftqaz” Milli Holdinq Şirkəti, “Ekonordragmet” Birgə Müəssisəsi, Almaniyanın “Facet”, “Oswald Shults”, “Emscher Genossenschatt”, “BAMAG”, “Projekt Engineerinq Wincker GmdH”, İsveçrənin “Alfa-Laval”, Çexiyanın “İNCHETA”, ABŞ-ın “Tetra Tech İnc”, “Nalco”, Böyük Britaniyanın “SURFACE ACTİVE SOLUTİONS”, Yaponiyanın “İTECO Enginerinq Co.Ltd (İTEC)” və başqa nüfuzlu xarici şirkətlərlə işgüzar əməkdaşlıq münasibətləri yaradılmışdır. Keçən il “Ekol Mühəndislik Xidmətləri” QSC ilə “Ekonordragmet” Birgə Müəssisəsi arasında sorbentin birgə istehsalına dair Alyans müqaviləsi imzalanmışdır. Qurum, həmçinin Hollandiyanın “AA Servicess” şirkəti ilə birlikdə “BP Exploreyşn (Kaspian Sİ)” LTD tərəfindən “Tullantıların idarə olunması xidmətlərinin göstərilməsi” layihəsi üzrə keçirilən tenderin qalibi olmuşdur. Layihənin icra olunması məqsədi ilə “Ekol” öz tərəfdaşı - Hollandiyanın “AA Servicess” şirkəti ilə birlikdə “AAS-Ekol” MMC birgə müəssisəsini təsis etmişdir. 2009-cu ildə “Salyan OİL” LTD tərəfindən işlənilən “Qarabağlı” və “Kürsəngi” yataqlarının mədən ərazilərində qazma şlamın rekultivasiyası və bioremediasiyası layihəsini uğurla başa çatdıran QSC 2010-cu ildə “Azərneft” İstehsalat Birliyi ilə H.Z.Tağıyev adına, “Abşeronneft”, “Siyəzənneft” neft və qazçıxarma idarələrinin mədənlərində, eləcə də Böyük Şor sahəsində oxşar layihələrin icrasına başlamışdır. İndiyədək bu istiqamətdə xeyli iş görülmüşdür. Öz fəaliyyətini beynəlxalq standartlar səviyyəsində quran “Ekol Mühəndislik Xidmətləri” QSC “TSE-İSO-EN-14001” beynəlxalq sertifikatına layiq görülmüş, habelə bir sıra aidiyyatı dövlət qurumlarının müvafiq lisenziyalarını almağa müvəffəq olmuşdur. Şirkət ilbəil böyüyür, inkişaf edir.

QSC-nin əldə etdiyi nailiyyətlər respublika ictimaiyyətinə də yaxşı məlumdur. 2008-2009-cu illərdə QSC ölkə iqtisadiyyatına verdiyi töhfələrə və ətraf mühitin mühafizəsi sahəsində göstərdiyi xidmətlərə görə “CASPİAN ENERGY” və “CONSULTİNG & BUSINESS” jurnallarının “İlin şirkəti” nominasiyası üzrə mükafatlarını almışdır. Bundan başqa, “Ekol Mühəndislik Xidmətləri” QSC 2010-cu ildə “Ekologiya ili” çərçivəsində həyata keçirdiyi aktual layihələrə, eləcə də ekoloji vəziyyətin yaxşılaşdırılması istiqamətində gördüyü işlərə görə “İlin ekologiya şirkəti” nominasiyası üzrə “Caspian Energy Award-2010” mükafatına layiq görülmüşdür.

Fəaliyyət sahələrini gündən-günə genişləndirən, maddi-texniki bazasının gücləndirilməsi, kadr potensialının artırılması sahəsində məqsədyönlü tədbirlər həyata keçirən “Ekol Mühəndislik Xidmətləri” QSC ekologiya və mühəndislik xidmətləri sahəsində təkcə respublikamızda deyil, regionda və dünyada tanınmış bir şirkət kimi fəaliyyətini uğurla davam etdirir.