“Ekol Mühəndislik Xidmətləri” QSC əməkdaşlıq əlaqələrini genişləndirir
Bakı, 19 avqust (AZƏRTAC). Son illər bir çox xarici şirkətlər “Ekol Mühəndislik Xidmətləri” QSC ilə əməkdaşlıq əlaqələrinin qurulmasına maraq göstərir və bu istiqamətdə silsilə görüşlər keçirilir. Belə görüşlərdən biri də bu günlərdə QSC-in baş ofisində Rusiyada fəaliyyət göstərən “Mirriko” şirkətlər qrupunun (ŞQ) təşəbbüsü ilə keçirilmişdir.
QSC-dən AZƏRTAC-a verilən məlumata görə, görüşdə tərəflər fəaliyyət sahələri və texniki imkanları barədə məlumat vermiş, eyni zamanda “Mirriko” ŞQ-in təqdimatı olmuşdur. “Mirriko” ŞQ-in nümayəndələri neftlə çirklənmiş torpaqların və sənaye-çirkab sularının təmizlənməsi, neft şlamının utilizasiyası sahəsində geniş təcrübəyə və texniki imkanlara malik olduqlarını, bu sahədə bir çox layihələr həyata keçirdiklərini diqqətə çatdırmış, QSC ilə əməkdaşlıq etmək niyyətində olduqlarını bildirmişlər.
“Ekol Mühəndislik Xidmətləri” QSC-in rəhbərliyi oxşar şirkətlərlə əməkdaşlıq əlaqələrinin qurulmasında maraqlı olduqlarını rusiyalı həmkarlarının nəzərinə çarpdırmışlar.
Qonaqlar QSC-in istehsalat sahələrində olmuş, sənaye-çirkab sularının, parafinin təmizlənməsi, neft şlamının emalı və zərərsizləşdirilməsi ilə maraqlanmışlar. Texnoloji proseslər haqqında mütəxəssislər arasında geniş müzakirələr aparılmışdır. Sonda gələcəkdə əməkdaşlıq əlaqələrinin qurulması məqsədilə, texnoloji proseslərin daha da modernləşdirilməsi və nanotexnologiyaların tətbiqi sahəsində “Mirriko” ŞQ-in nümayəndələri qarşısında məsələlər qoyulmuş və təkliflər paketinin hazırlanıb təqdim olunması qərara alınmışdır.
Bölmənin digər xəbərləri
