EKOLOGİYA MÖVZUSUNDA BEYNƏLXALQ KONFRANSIN GÜNDƏLİYİ AÇIQLANMIŞDIR
Bakı, 3 iyul (AZƏRTAC). İyulun 5-7-də Qəbələdə keçiriləcək ekologiya mövzusunda beynəlxalq konfrasın gündəliyi açıqlanmışdır. Ekologiya və Təbii Sərvətlər Nazirliyindən AZƏRTAC-a verilən məlumata görə, iyulun 5-6-da ekspertlərin seminarı keçiriləcəkdir. 4 sessiyada Şərqi Avropa və Mərkəzi Asiya ölkələrində biomüxtəlifliyin mühafizəsi, bu sahədə milli və regional fəaliyyətin planlaşdırılması məsələləri müzakirə olunacaqdır.
İyulun 7-də “Bioloji müxtəliflik və minilliyin inkişaf məqsədlərinə nail olunması” mövzusunda konfrans keçiriləcəkdir. Konfrans çərçivəsində “Ekoloji şəbəkənin yaradılması və yoxsulluğun səviyyəsinin azadılması”, “Biomüxtəliflik üzrə Konvensiyasının 2010-cu il üçün məqsədləri və strateji plan: Avropa regionu üzrə prioritetlər” mövzusunda “dəyirmi masa”lar təşkil ediləcəkdir.
Xatırladaq ki, Avropa ölkələrinin ətraf mühit üzrə nazirləri və ekspertlər səviyyəsində keçirilən, BMT Baş Məclisinin biomüxtəlifliyə dair növbəti sessiyasına hazırlıq məqsədi daşıyan konfransın təşkilatçıları Azərbaycan hökuməti və BMT-nin Ətraf Mühit Proqramıdır.
Konfransda Avropa ölkələrinin ekologiya nazirlərinin, BMT-nin Ətraf Mühit Proqramının Avropa regional bürosunun direktoru Kristof Buvyenin, Biomüxtəliflik Konvensiyasının icraçı katibi Əhməd Coqlafın və ekspertlərin iştirakı gözlənilir.
Bölmənin digər xəbərləri
