Ekoloji ekspertiza rəyinin verilməsi üçün 2 min 710 müraciətə baxılmışdır
Bakı, 29 iyul (AZƏRTAC). Ötən il aparılmış geofiziki tədqiqatlar nəticəsində Şəmkir rayonu ərazisində platin qrupu metalların köklü yatağının olduğu aşkarlanmışdır. Bu nəticə Azərbaycan geoloqlarının son dövrlərdə əldə etdiyi ən böyük uğurdur. Yatağın sənaye əhəmiyyətini qiymətləndirmək məqsədi ilə layihə-smeta sənədləri tərtib edilmiş və çöl işlərinə başlanmışdır.
Ekologiya və Təbii Sərvətlər Nazirliyindən AZƏRTAC-a verilən məlumata görə, 2011-ci ilin birinci yarısında Böyük Qafqazın Azərbaycan hissəsinin cənub yamacında, Kiçik Qafqazda, Naxçıvan Muxtar Respublikası və Xəzəryanı dağlıq ərazilərdə geoloji-axtarış işləri davam etdirilmişdir.
Bundan başqa, bir sıra rayonlarda faydalı qazıntıların dəqiq axtarışı üçün perspektivli sahələr ayrılmış və yeni filiz zonaları müəyyənləşdirilmiş, Abşeron, Şamaxı, İsmayıllı bölgələrində zəlzələlərin uzun və qısamüddətli proqnozlaşdırılması həyata keçirilmişdir.
Eyni zamanda, bu ilin 6 ayı ərzində ekoloji ekspertiza rəyinin verilməsi üçün dövlət təşkilatları və vətəndaşların 2 min 710 müraciətinə vaxtında baxılaraq icraları təmin olunmuşdur. Ətraf mühitlə bağlı layihələrin ekspertizası üzrə isə son 6 ayda 9 layihəyə, 8 texniki iqtisadi əsaslandırma sənədinə baxılmış və müvafiq tələblər müəyyənləşdirilməklə razılaşdırılmışdır.
Bölmənin digər xəbərləri
