Ekoloji Park”ın istixana kompleksində son tamamlama işləri görülür
Bakı, 23 iyun (AZƏRTAC). Azərbaycan Respublikası Dövlət Neft Şirkəti tərəfindən reallaşdırılan “Ekoloji Park” layihəsinin tərkib hissəsi olan və ən müasir standartlara cavab verən 5 min kvadratmetrlik istixana kompleksi istifadəyə verilmək mərhələsindədir. Kompleks üç əsas hissədən - toxum, böyütmə və yetişdirilməsi xüsusi şərait tələb edən dekorativ bitkilər üçün ayrılmış oranjereya şöbələrindən ibarətdir. İstixanada ildə 1 milyon şitil yetişdirmək mümkündür.
Şirkətin mətbuat xidmətindən AZƏRTAC-a bildirmişlər ki, ilin əvvəlindən istixananın toxum şöbəsində xüsusi şəbəkələrdə toxum əkininə başlanılmışdır. Toxumlar xüsusi şəbəkələrdə, mikroelementlərlə zənginləşdirilmiş və torfla qarışdırılmış qruntda yetişdirilir. Hazırda istixanada Eldar şamı, ağ şam, həmişəyaşıl sərv, Şərq tuyası, Avropa zeytunu, ağ akasiya və s. ağac növləri ilə yanaşı otaq bitkiləri, müxtəlif növ bəzək gülləri və digər bitki növlərinə aid 100 minə yaxın toxum əkilmişdir. Bitki növlərinin yetkin tinglik dövrünə qədər vahid coğrafi arealda (Abşeron şəraitində) yetişdirilməsi yaşıllıq zolaqları salınan sahələrdə əkindən sonrakı adaptasiya prosesinin normal keçməsi və təbii itkilərin minimuma endirilməsinə şərait yaradır.
Bölmənin digər xəbərləri
