Ekspert: Yeni tələblər müəllim peşəsinin nüfuzunun yüksəldilməsinə töhfə verəcək
Bakı, 23 iyul, AZƏRTAC
“Ümumi təhsil haqqında” Azərbaycan Respublikasının Qanununa edilən son dəyişikliklərə əsasən, dövlət ümumi təhsil müəssisələrində təhsilverənlər üçün geyimlə bağlı tələblərin müəyyənləşdirilməsi nəzərdə tutulur. Bu yenilik ictimaiyyətdə müxtəlif yanaşmalarla qiymətləndirilir.
Bu sözləri AZƏRTAC-a açıqlamasında təhsil eksperti Məzahir Məmmədli deyib. “Milli Məclisin qəbul etdiyi və Prezident İlham Əliyevin təsdiqlədiyi “Ümumi təhsil haqqında” Azərbaycan Respublikasının Qanununda dəyişiklik edilməsi barədə Qanuna əsasən, dövlət ümumi təhsil müəssisələrində təhsilverənlər üçün geyimlə bağlı tələblərin müəyyən olunması nəzərdə tutulur. Bu tələblər müvafiq icra hakimiyyəti orqanının müəyyən etdiyi qurum tərəfindən hazırlanacaq. Burada əsas məqsəd müəllim peşəsinin nüfuzunun qorunması, təhsil müəssisələrində peşəkar mühitin formalaşdırılması və etik davranış standartlarının daha da təkmilləşdirilməsidir”, - deyə o vurğulayıb.
Ekspertin sözlərinə görə, müəllimlərin geyimi ilə bağlı müəyyən standartların tətbiqi beynəlxalq təcrübədə geniş yayılmış yanaşmalardan biridir: “Dünyanın qabaqcıl təhsil sistemlərinə malik ölkələrində müəllimlərin peşə fəaliyyətinə uyğun geyim və davranış standartları mövcuddur. Bu standartlar tədris prosesinin keyfiyyətinə, məktəbdə sağlam mənəvi-psixoloji mühitin formalaşmasına və müəllim nüfuzunun qorunmasına xidmət edir. Azərbaycanda da bu istiqamətdə hüquqi bazanın formalaşdırılması beynəlxalq təcrübəyə uyğun addım kimi qiymətləndirilə bilər”.
Təhsil eksperti vurğulayıb ki, hazırda Azərbaycanda 30-dan artıq ümumi təhsil müəssisəsində müəllimlər üçün vahid geyim forması tətbiq olunur. Bu qərarlar məktəblərin pedaqoji şuraları tərəfindən qəbul edilib və praktikada müsbət nəticələr verib. Belə yanaşma təhsil müəssisələrində korporativ mədəniyyətin formalaşmasına, kollektivin vahid dəyərlər ətrafında birləşməsinə və peşəkar mühitin gücləndirilməsinə töhfə verir.
Məzahir Məmmədli hesab edir ki, yeni tələblərin tətbiqi müəllim peşəsinin ictimai nüfuzunun daha da yüksəldilməsinə xidmət edə bilər.
“Cəmiyyət hər zaman müəllimə xüsusi hörmət və ehtiramla yanaşıb. Müəllimin xarici görünüşü, davranışı və peşə etikası onun nüfuzunu formalaşdıran əsas amillərdəndir. Geyimlə bağlı müəyyən standartların tətbiqi müəllimlərin ictimai məkanlarda və təhsil müəssisələrində daha peşəkar şəkildə təmsil olunmasına şərait yarada bilər”, - deyə ekspert vurğulayıb. Onun sözlərinə görə, bu dəyişikliklər tədris mühitinin sağlamlaşdırılması baxımından da əhəmiyyət daşıyır. Məktəb ilk növbədə təhsil və tərbiyə məkanıdır. Təhsilverənlərin geyimi ilə bağlı müəyyən tələblərin olması məktəbdə peşəkar atmosferin qorunmasına, şagirdlərin diqqətinin tədris prosesinə yönəlməsinə və ümumi təhsil mühitinin daha səmərəli təşkilinə müsbət təsir göstərə bilər.
Ekspert qeyd edib ki, Azərbaycan müəllimləri indiyədək də geyim mədəniyyəti və etik davranış qaydalarına yüksək səviyyədə riayət ediblər.
“Qanunda nəzərdə tutulan dəyişikliklər müəllimlərin fəaliyyətinə əlavə məhdudiyyətlər qoymaqdan daha çox, mövcud yanaşmaların hüquqi əsaslarının müəyyənləşdirilməsinə xidmət edir. Müəyyən ediləcək standartlar müəllim peşəsinin nüfuzunun daha da yüksəldilməsinə və ümumi təhsil müəssisələrində vahid peşəkar mühitin formalaşdırılmasına töhfə verəcək”, - deyə Məzahir Məmmədli bildirib.
Müxbir – Nərmin Murad
Bölmənin digər xəbərləri
