CƏMİYYƏT
Ekspertlər: Bəşəriyyət iqlim dəyişmələrinin miqyasını məhdudlaşdırmaq iqtidarındadır
![Ekspertlər: Bəşəriyyət iqlim dəyişmələrinin miqyasını məhdudlaşdırmaq iqtidarındadır](/files/2023/1/1200x630/1678795222548305094_1200x630.jpg)
Bakı, 14 mart, AZƏRTAC
Bu həftə İsveçrənin İnterlaken şəhərində qəbul olunacaq sənəd iqlim dəyişmələrinə qarşı mübarizə üzrə siyasi tədbirlər görülməsində təməl rolunu oynayacaq. İqlim dəyişmələri üzrə hökumətlərarası ekspertlər qrupu Altıncı dəyərləndirmə məruzəsinin yekun hissəsini - Ümumiləşdirilmiş Məruzəni təsdiqləməkdən ötrü toplaşıb.
AZƏRTAC BMT-nin saytına istinadla xəbər verir ki, sənəd 2015-ci ildə başlanmış cari dövr ərzində hökumətlərarası ekspertlər qrupu tərəfindən dərc olunan əvvəlki hesabatların nəticələrini birləşdirir və yekunlaşdırır.
İqlim dəyişmələri üzrə hökumətlərarası ekspertlər qrupunun sədri Li Hoyesun konfransı açaraq deyib: “Ümumiləşdirilmiş Məruzə təsdiqləndikdən sonra o, iqlim dəyişmələrinə qarşı mübarizə üzrə fəaliyyətin formalaşdırılması üçün əsas onilliyin qalan hissəsində başlıca siyasi sənədə çevriləcək”.
“Bu, iqlim dəyişmələri üzrə problemlərin həllində hazırkı və gələcək siyasət üçün çox mühüm dərslikdir. Yanlış düşünməyin - boş dayanmalar və ləngimələr variant qismində göstərilməyib”, - deyə Li Hoyesun əlavə edib.
Ekspertlər daha əvvəl xəbərdar etmişdilər ki, insan fəaliyyəti nəticəsində əmələ gələn iqlim dəyişmələri planetin bütün regionlarında müşahidə olunur. Həm də bu proses daha da intensivləşir, yaranan meyillərin bəziləri artıq bərpaolunmazdır.
Bundan başqa, alimlərin məlumatına görə, Yer kürəsinin bütün iqlim sistemi dəyişir və bu dəyişikliklər atmosferin, okeanların, buz örtüklərinin və Yer səthinin vəziyyətində özünü göstərir. Onların əksəriyyəti misilsizdir, bəzi meyilləri, məsələn, okean səviyyəsinin qalxmasını yaxın əsrlərdə və ya hətta minilliklərdə geri döndərmək mümkün olmayacaq.
Lakin məruzənin müəllifləri - dünyanın 66 ölkəsindən 234 ekspert hesab edir ki, bəşəriyyət iqlim dəyişmələrinin miqyasını məhdudlaşdırmaq iqtidarındadır. Atmosferə zərərli maddələrin, o cümlədən istixana qazları tullantılarını əhəmiyyətli şəkildə azaltmaqla, qısa müddət ərzində havanın keyfiyyətini yaxşılaşdırmaq və qlobal temperaturu sabitləşdirmək mümkündür.
BMT-nin Baş katibi Antonio Quterreş görüş iştirakçılarına videomüraciətində deyib: “Sizin ötənilki hesabatınız açıq şəkildə nümayiş etdirdi ki, dünya iqtisadiyyatının bütün sektorlarında tullantıların tez və kəskin surətdə azaldılması hesabına 1,5 dərəcəlik qlobal istiləşməni məhdudlaşdırmaq mümkündür. Bu yaxınlardakı məruzələrinizdə də fəaliyyətə dərhal başlamağın zəruri olması vurğulanır”.
O qeyd edib ki, ekspertlər beynəlxalq birliyə qlobal istiləşmə ilə mübarizə sahəsində düzgün həll yollarını göstərməlidirlər. Quterreş xatırladıb ki, 2023-cü ilin sonunda dünya liderləri BMT-nin iqlim dəyişmələri üzrə Konfransına toplaşacaq və ölkələrin iqlim üzrə Paris Sazişinin icrasında əldə etdikləri irəliləyişləri müzakirə edəcəklər.