Əli Ağrı: Ulu Öndəri şəxsən tanıdığıma görə özümü çox xoşbəxt hesab edirəm
Ankara, 21 dekabr, AZƏRTAC
Ümummilli Lider Heydər Əliyevin həm şöhrətli siyasi və dövlət xadimi, həm də nəcib xüsusiyyətlərə malik insan kimi xarakterizə etmək şərəfli olduğu qədər də məsuliyyətlidir. Müasirləri və Ulu Öndəri şəxsən tanıyanların xatirələrini axtarıb tapmaq həm mənəvi borcumuz, həm də qeyd etdiyimiz məsuliyyət hissinin təzahürüdür. Beləliklə, dünyaşöhrətli siyasi xadimin hər dəfə böyük səmimiyyətlə “Dostum Əli” deyə müraciət etdiyi daha bir şəxsi oxuculara təqdim edirik.
Ümummilli Lider Heydər Əliyevi şəxsən tanıdığıma görə özümü çox xoşbəxt hesab edirəm. Mən Ulu Öndəri ata məhəbbəti ilə sevmişəm və dahi şəxsiyyətin məni “dostum” adlandırmasından mənəvi güc almışam. O dövrün bütün proseslərinin iştirakçısı olan bir vəzifəli şəxs kimi tam məsuliyyətlə deyə bilərəm ki, Ümummilli Lider Heydər Əliyevin Naxçıvana dönüşü təkcə muxtar respublikanın nicatı üçün deyil, Azərbaycanın üzləşdiyi təhlükələrin dəf edilməsi, Türkiyənin inkişafı, Türk dünyasının birliyinin təməlinin qoyulması baxımından da tarixi şans oldu.
Bu fikirləri AZƏRTAC-a müsahibəsində İqdırın sabiq bələdiyyə sədri Əli Ağrı ifadə edib.
Ümummilli Lider Heydər Əliyevlə ilk tanışlığının Naxçıvan şəhərində olduğunu, dünyaşöhrətli siyasi xadimin Türkiyədən muxtar respublikaya humanitar yardım gətirən heyətə göstərdiyi diqqəti və qonaqpərvərliyi indiyədək çox yaxşı xatırladığını bildirən Əli Ağrı deyib: “O dövrdə Azərbaycan böyük təlatümlər içərisində idi. Dövləti məhv edir, ölkəni girdaba yuvarlayırdılar. Ulu Öndər Heydər Əliyev bütün bunları böyük ürəkağrısı ilə yaşayırdı. İlk görüşümüzdə söhbətimizin əsas hissəsini Ermənistanın Azərbaycana qarşı işğalçılıq siyasəti nəticəsində bölgədə yaranmış gərginlik oldu. Heydər Əliyev gecə-gündüz Naxçıvanın müdafiəsinin təşkili, bölgədəki enerji və ərzaq böhranından çıxış yolu axtarırdı.
Ümummilli Lider Heydər Əliyevi dəvətlərini qəbul edib evlərinə qonaq gəldiyini sadəlik və dostcanlılıq, ailələri üçün hər zaman qürurverici və sevincli hadisə kimi dəyərləndirən Əli Ağrı deyib: “Nəcib hərəkətləri, yüksək insani keyfiyyətləri, milli ailə qaydalarına yüksək dəyər verməsi Ulu Öndər Heydər Əliyevlə ünsiyyətdə olan hər kəsi heyran edirdi. Həmin şərəfli gün Ulu Öndərin evimizdə etdiyi dadlı-duzlu söhbətləri hər zaman xatırlayır və xoşhal oluruq”.
Ümummilli Lider Heydər Əliyevin vəfatının Türk dünyası üçün böyük acı olduğunu deyən Ə.Ağrı qeyd edib ki, bu itkidən sonra bir daha Naxçıvana ayaq basmağa özündə taqət tapa bilməyib.
“Heydər Əliyevlə söhbətləriniz əsasən hansı mövzuda olub” sualını cavablandıran Əli Ağrı bildirib: “Heydər Əliyev müdrik insan, gözəl natiq, böyük şəxsiyyət kimi ətrafdakıların sevgisini qazanmışdı. O, hər zaman deyirdi ki, Azərbaycanın müstəqilliyinin qorunması ilə Türkiyənin qüdrətlənməsi arasında müəyyən qanunauyğunluq var. Yaxşı yadımdadır, Azərbaycanın görkəmli ziyalıları Naxçıvana gəlmişdilər. Biz də Türkiyədən kiçik bir heyətlə orada idik. Ziyalılar xalqın ayrı-ayrı təbəqələrinin istəyini çatdırırdılar. Əslində, bunlar istək yox, tələb idi. Qəfildən Ulu Öndər “Əli bəy, sizin fikriniz nədir?” deyə soruşanda heç tərəddüd etmədən belə cavab verdim: “Qoç-qocaman Sovetlər İttifaqına sığmayan Heydər Əliyev Naxçıvana sığa bilməz. Azərbaycanın ümidi Sizədir. Xalqın səsinə səs verməlisiniz”. Sözlərim alqışlarla qarşılandı. Mən, əslində, həm də Qars və İqdır əhalisinin timsalında Türkiyənin istəyini ifadə etmişdim. Çünki o dövrdə artıq Türkiyə KİV-ləri də Heydər Əliyevin Azərbaycanın xilaskarı olduğunu yazmağa başlamışdılar. Naxçıvanın işğaldan qorunması namus məsələsi olaraq hər bir vicdanlı, vətənpərvər türkün də ailə məsələsi idi.
İqliminə və relyefinə, əhalisinə görə Naxçıvan, İqdır, Qars və Ərzurum arasında bir çox bənzərliklərin olması ilə bağlı sualı cavablandıran Ə.Ağrı bildirib: “Biz, sözün əsl mənasında, eyni ruhlu insanlarıq. Dərdimiz də, xoş günümüz də eyni paylaşılıb. Ənənələrimiz və dəyərlərimiz bir-birini tamamlayır. Bütün bunlarla yanaşı, bölgə əhalisi olaraq heç vaxt kənar qüvvələrin təxribatına uymamalıyıq. Dövlətin gücü və xalqın rifahı amalımızdır. Yaxşı yadımdadır, İqdırdan bir dəstə hazırlayaraq Yerevana aparmaq istəyirdilər. Bu barədə mənə də müraciət olundu. Onlarla çox sərt danışdım. Dedim ki, Azərbaycanın işğal altındakı torpaqları düşməndən azad olunmayınca, münasibətlər düzəlməyincə belə xain səfər etsək, Heydər Əliyevin ruhu bizi bağışlamaz.
Ulu Öndərin Türk dünyasının birliyi ilə bağlı fikirlərini xatırladan sabiq nazir deyib: “Heydər Əliyevdə Azərbaycanın üstünü alan qara buludların dağılacağına, dövlət müstəqilliyinin mütləq qorunacağına sonsuz inamı vardı. Dahi şəxsiyyətin Türk dünyası barədə fikir və düşüncələri adamı heyran edirdi. Ümumiyyətlə, o, heç bir hadisəyə ayrıca yanaşmazdı. Proseslərə kompleks və qlobal baxışdan yanaşırdı. Hazırda regionda və Türk dünyasının həmrəyliyini yaradan proseslərə dair onun fikir və düşüncələri böyük uzaqgörənlik, ən böyük türkçülük idi.
Sabir Şahtaxtı
AZƏRTAC-ın xüsusi müxbiri
Ankara
Bölmənin digər xəbərləri
