Əlilliyin qiymətləndirilməsində şəffaflıq və operativliyin təmini məqsədilə pilot layihəyə start verilib
Bakı, 20 aprel, AZƏRTAC
İcbari Tibbi Sığorta üzrə Dövlət Agentliyi tərəfindən əlilliyin qiymətləndirilməsi istiqamətində start verilən layihə çərçivəsində 2023-cü il aprelin 20-də Quba Rayon Mərkəzi Xəstəxanasına səfər təşkil edilib. Səfərin məqsədi media heyətini və Litva Respublikasının Milli Tibbi Sığorta Fondu (tvininq layihəsinin) nümayəndələrini əlilliyin qiymətləndirilməsində vətəndaşların əyani baxışdan keçirilməsi qaydası, bu məqsədlə tibb müəssisəsində yaradılan şərait və görülən işlərlə tanış etməkdir.
İcbari Tibbi Sığorta üzrə Dövlət Agentliyindən AZƏRTAC-a verilən məlumata görə, agentliyin Tibbi planlama departamentinin rəhbəri Hikmət İbrahimli qeyd edib ki, əlilliyin qiymətləndirilməsi sahəsində şəffaflığın, obyektivliyin və operativliyin təmin edilməsi istiqamətində agentlik tərəfindən müvafiq tədbirlər görülür: “Növbəti tədbir pilot layihənin icrası ilə bağlıdır. Layihənin əsas məqsədi tibb müəssisələrində Həkim Məsləhət Komissiyalarının (HMK) işini təkmilləşdirmək, göstərilən tibbi xidmətlərin keyfiyyətini artırmaq və vətəndaş məmnunluğunu təmin etməkdir. Layihənin icrasına ilkin olaraq Quba Rayon Mərkəzi Xəstəxanasında başlanılıb. HMK-nın fəaliyyəti xəstəxanaya müraciət edən şəxsin və müalicə həkiminin əlilliyə göstərişin olmasına dair tibbi sənədlərinin, qoyulan diaqnozların düzgünlüyünə nəzarət etmək, 2022-ci ildə Nazirlər Kabinetinin qərarı ilə təsdiq edilən əlilliyin müəyyən olunması meyarlarına uyğunluğu yoxlamaq üçün vətəndaşın yerində əyani müayinəsini aparmaqdan ibarətdir”.
Quba Rayon Mərkəzi Xəstəxanasının direktoru Əliyar Sərvərovun sözlərinə görə, vətəndaşların HMK tərəfindən qəbulu və əyani olaraq tibbi yoxlamanın aparılması üçün xəstəxanada qəbul və müvafiq otaqlar ayrılıb: “Müayinə otaqları bütün lazımi avadanlıqlarla (elektrokardioqrafiya, exokardioqrafiya, bronxoskopiya, portativ rentgen, ultrasəs müayinə) təchiz edilib. Quba və Qusar sakinlərinin əlillik məsələləri üzrə müraciətləri ilə bağlı həftəlik xüsusi qəbul günləri müəyyən edilib. Burada həftə ərzində 70-100 vətəndaşın müraciətlərinə baxılır, mövcud sənədlər nəzərdən keçirilir, vətəndaşlar yerində müayinə olunur və müvafiq qərarın qəbulundan sonra toplanmış sənədlər Əmək və Əhalinin Sosial Müdafiəsi Nazirliyinin tabeliyində Dövlət Tibbi-Sosial Ekspertiza və Reabilitasiya Agentliyinə yönləndirilir”.
Qeyd edilib ki, layihə çərçivəsində Quba Rayon Mərkəzi Xəstəxanasında vətəndaşların rahatlığı və məlumatlara əlçatanlığı məqsədilə monitorlar quraşdırılıb. Monitor vasitəsilə vətəndaşlar yeni təsdiq edilən əlilliyin müəyyən olunması meyarları və müvafiq meyarlar üzrə gərəkli olan müayinələrin siyahısı ilə təsviri şəkildə tanış ola bilirlər. Bu zaman vətəndaşın şəxsi müayinələri arasında natamamlıq və ya dəqiqləşdirilməmiş diaqnoz olduğu təqdirdə yerində təkrar həkim tərəfindən yoxlanılmasına imkan yaradır. Bu da öz növbəsində vətəndaşın əlavə tibbi yoxlama üçün digər xəstəxanaya təkrar müraciət etməsinin, nəticə olaraq vaxt itkisinin qarşısını alır.
Pilot layihənin nəticələrindən asılı olaraq, əlilliyin qiymətləndirilməsi məsələləri üzrə ölkənin digər bölgələrində də mərkəzləşdirilmiş xəstəxanaların müəyyən edilərək layihənin icrasının davam etdirilməsi nəzərdə tutulub.
Bölmənin digər xəbərləri
