Elman Nəsirov: “5-ci kolon” milli xəyanətin klassik nümunəsidir
Bakı, 10 aprel, AZƏRTAC
Proqnozlar özünü tam doğrultdu. Azərbaycan yenə hədəfdədir. Ölkəmizə 4 “kolon” üzrə yürüdülən hücumlar intensivləşib. Qısamüddətli pauzalar fürsət gözləmək mahiyyəti daşıyır. Bu “kolon”lardan birincisi qəsbkar Ermənistandır. İkincisi, dünyadakı erməni lobbisidir. Üçüncüsü, təbii ki, erməni diasporudur. Dördüncüsü isə beynəlxalq islamofob qüvvələrdir. Onların anti-Azərbaycan basqılarının səmərəlilik əmsalı sıfıra bərabər olduğundan ölkə daxilində “Axilles dabanı”nın axtarışı və tapılması 4 “kolon”un simaları üçün strateji xarakter daşıyır. Bu halda, daxilimizdə olan milli satqın və dönüklərin muzdlu xidmətindən istifadə edilməsi zərurətə çevrilir. Nəticədə “5-ci kolon” formalaşdırılır. Onlar ölkəmizdə siyasi qüvvə deyil, siyasi ünsür və dəstə səviyyəsindədir. Məqsədləri ölkədə xaos mühiti formalaşdırmaq, səfərbər olunmuş cəmiyyət və vətəndaş həmrəyliyini pozmaq və nifaq salmaqdır.
Bu sözləri AZƏRTAC-a açıqlamasında Milli Məclisin deputatı, YAP Beynəlxalq Əlaqələr Komissiyasının katibi, siyasi elmlər doktoru, professor Elman Nəsirov söyləyib.
Bu ünsürlərin adətən Azərbaycanın dünyanın diqqət mərkəzində olduğu xüsusi məqamlarda (mühüm beynəlxalq tədbirlərə ev sahibliyi edərkən, seçkilər zamanı və s.) daha çox fəallaşdığını diqqətə çatdıran deputat deyib: “İndiki halda dünyanı əsarətə almış koronavirus (COVID-19) pandemiyasının hər bir dövlətə, o cümlədən Azərbaycana mənfi təsirlərinin artdığı, bu baxımdan xalqın sağlamlığı və dövlətin təhlükəsizliyi üçün ciddi təhdidlərin yarandığı bir reallıqda yenidən sağa-sola boylanmaqla, öz xislətlərinə müvafiq şər, böhtan, yalan yaymaqla məşğuldurlar. Onlar xalqımız və dövlətimizin tarixi sınaq qarşısında qaldığı mürəkkəb şəraitdə siyasi mənsubiyyətlərini bir kənara qoyub ümummilli birlik və həmrəyliyə töhfə vermək əvəzinə, saxta “vətənpərvərlik”lə qılaflanmış “don”larını çıxararaq əsl simalarını, əslində isə simasızlıqlarını növbəti dəfə nümayiş etdirməkdə, hər cür təxribatlara əl atmaqdadırlar”.
E.Nəsirov bildirib ki, Prezident İlham Əliyev martın 19-da Novruz bayramı münasibətilə Azərbaycan xalqına təbrikində bu təxribatların icraçıları və onların çirkin məqsədlərinə tam aydınlıq gətirərək təxribatların haradan qaynaqlandığını açıq şəkildə göstərdi və qeyd etdi ki, bu təxribat haradan gəlir, həmin o “5-ci kolon”dan, işimizdə olan düşmənlərdən, özünü müxalifət adlandıran ünsürlərdən, xaricdən pul alan satqınlardan. Onların əsas məqsədi Azərbaycanı məhv etməkdir. Sanki istəyirlər ki, iğtişaş olsun, istəyirlər ki, aləm dağılsın, istəyirlər ki, panika olsun. Onlar düşməndirlər və biz bunu açıq deməliyik.
Prezident İlham Əliyevin rəhbərliyi ilə Azərbaycan hökumətinin xalqımızı bu qorxunc xəstəliyin acı nəticələrindən hifz etmək üçün atdığı sərt karantin tədbirləri “5-ci kolon” nümayəndələri - Əli Kərimli, Cəmil Həsənli və onların “şineli”ndən çıxmış dəstənin digər üzvləri tərəfindən süngü ilə qarşılanıb. Onlar növbəti qarayaxma, yalan və iftira kampaniyasını həyata keçirmək üçün növbəyə durublar. Onların ianələrini aldıqları müəyyən xarici dövlətlərin eyni infeksiyaya qarşı eyni qəbildən olan addımlarının şərəfinə mədhiyyələr söyləmək növbəsinə dayanıqları da diqqətdən yayınmır. Bu ikiüzlülük milli xəyanətin əsl klassik nümunəsidir. Hətta iş o yerə gəlib çatıb ki, bu antimilli ünsürlər işğalçı Ermənistanın koronovirusa qarşı atdığı müəyyən addımları təqdir etməkdən belə çəkinmir, guya ki, rəsmi İrəvanın məcburi məhdudiyyətlərə rəvac verən addımları ölkədə “demokratiyanın baza prinsiplərini zədələmir” kimi gülünc və sərsəm ifadələr işətməkdən belə vaz keçmirlər. Halbuki “sapı özümüzdən olan baltalar” çox gözəl bilirlər ki, işğalçı Ermənistanda martın 16-da fövqəladə vəziyyət elan edilib. Mətbuata senzura tətbiq olunub. Kütləvi informasiya vasitələri və sosial şəbəkələrin koronavirus pandemiyası ilə bağlı yalnız rəsmi dövlət məlumatlarına istinad etmələri bir qanun tələbi kimi irəli sürülüb. Bunun əksi olduqda müvafiq addımı atmış tərəf 2 saat ərzində mətbuatda təkzib verməlidir. Bunun edilməyəcəyi təqdirdə fövqəladə vəziyyət rejiminin bütün sərtliyi ilə məlum qaydanı pozmuş tərəfə qarşı istifadə olunması sırf zaman məsələsidir.
Deputat öz fikirlərini Rusiya Prezidenti Vladimir Putinin “5-ci kolon”un mahiyyəti haqqında fikirlərinə istinad etməklə davam etdirib: "Putin deyir ki, radikal müxalifətin qurtardığı yerdə milli xəyanət başlayır. Əslində, radikal müxalifətçilər ilə “5-ci kolon” arasında sədd belə görünmür. Müxalifətçilərə gəldikdə isə onlar nə qədər sərt olsalar belə, dövlətlərinin milli maraqlarının müdafiəsi naminə mübarizə aparırlar, “5-ci kolon”un təmsilçiləri isə milli maraqları tapdalayaraq, xarici dövlətlərin sifarişlərini icra edirlər. “5-ci kolon” ölkə üçün “xərçəng şişi”dir. Ölkəmizdə radikal dəstə və qruplaşmalar öz naqis xislətlərinə və xudbin dünyagörüşlərinə adekvat olaraq “koronavirus demokratiyası” deyilən həqarətli bir termin də icad ediblər.
Bütün bunların təəssüf doğurduğunu vurğulayan Elman Nəsirov deyib ki, xalqımız belələrini “şanlı” keçmişlərinə görə “azadlıq aşiqləri” kimi xatırlayır və rədd edir. Bundan sonra isə müdrik xalqımızın onları “koronavirus demokratları” kimi permanent “siyasi izolyasiya”da saxlayacaqları və yenidən gəldikləri yerə - tarixin zibilxanasına göndərəcəkləri bir aksiomadır.
Bölmənin digər xəbərləri
