Elnur Zeynalov: Muğam gecələri milli musiqi irsimizin təbliğində mühüm rol oynayır
Bakı, 15 sentyabr, AZƏRTAC
Beynəlxalq Muğam Mərkəzində keçirilən “Muğamat axşamı” tədbirləri muğam sənətimizin qorunub yaşadılması, onun zəngin ənənələrinin gələcək nəsillərə ötürülməsi baxımından mühüm əhəmiyyət daşıyır. Mərkəzdə mütəmadi olaraq muğam gecələrinin, eləcə də bu istiqamətdə müxtəlif layihələrin təşkili milli musiqi irsimizin təbliği və inkişafı baxımından xüsusi önəm kəsb edir.
Bunu AZƏRTAC-a açıqlamasında muğam ifaçısı, Əməkdar artist, Prezident mükafatçısı Elnur Zeynalov deyib.
O bildirib ki, bu cür tədbirlər muğam sənətinin canlı ifa ənənələrinin qorunmasına, sənətkarların yaradıcılıq imkanlarının nümayişinə və muğamın daha geniş auditoriyaya çatdırılmasına böyük töhfə verir.
“Mən də bu tədbirlərdə ifaçı kimi iştirak edərək muğam sənətimizin yaşadılmasına, onun zəngin ənənələrinin qorunmasına və gələcək nəsillərə çatdırılmasına öz töhfəmi verməyə çalışıram. Muğam Azərbaycan xalqının zəngin mənəvi-mədəni irsinin mühüm tərkib hissəsidir. Bu sənətin yaşadılması yalnız onun ifa olunması ilə məhdudlaşmır. Eyni zamanda, muğam ənənələrinin gənc nəslə aşılanması, peşəkar ifaçılıq məktəbinin inkişaf etdirilməsi və sənətin geniş ictimaiyyətə təqdim olunması da olduqca vacibdir”, - deyə Əməkdar artist qeyd edib.
Müxbir – Gülay Nəzərova
Bölmənin digər xəbərləri
