Əməkdar jurnalist Zemfira Məhərrəmlinin 70 illik yubileyi qeyd edilib
Bakı, 28 noyabr, AZƏRTAC
Azərbaycan Mətbuat Şurasında yazıçı-publisist, Əməkdar jurnalist, pedaqogika üzrə fəlsəfə doktoru Zemfira Məhərrəmlinin 70 illik yubileyi münasibətilə toplantı keçirilib.
AZƏRTAC xəbər verir ki, əvvəlcə Zemfira Məhərrəmlinin həyat yoluna və çoxşaxəli yaradıcılığına həsr olunmuş videoçarx nümayiş olunub.
Mətbuat Şurasının sədri Rəşad Məcid çıxış edərək bildirib ki, Zemfira Məhərrəmli Bakı Dövlət Universitetinin jurnalistika fakültəsini fərqlənmə diplomu ilə bitirdikdən sonra müəllimi ustad jurnalist Nəsir İmanquliyevin dəvəti ilə "Bakı" və "Baku" axşam qəzetlərində 1978-ci ildən əmək fəaliyyətinə başlayıb. O, əvvəlcə müxbir, daha sonra həmin qəzetlərin elm, təhsil və mədəniyyət şöbəsinin müdiri vəzifəsində çalışıb.
Qeyd olunub ki, Z.Məhərrəmli 1991-ci ildən etibarən mətbuatda həm də hərbi mövzularla da mütəmadi çıxış edib. O, dəfələrlə qaynar nöqtələrdə olub, I Qarabağ müharibəsinin dəhşətini əks etdirən silsilə cəbhə reportajları hazırlayıb.
Azərbaycan Yazıçılar Birliyinin üzvü olan Z.Məhərrəmli “Döyüşə qızlar gedir”, “Qarabağda savaş var”, “Ötür durna qatarı”, “Qırx qız dastanı” kitablarının müəllifidir.
Rəşad Məcid diqqətə çatdırıb ki, Azərbaycan Jurnalistlər Birliyinin üzvü olan Z.Məhərrəmlinin əsərləri rus, ingilis, Belarus, türk və fars dillərində də çap olunub. İngilis dilində nəşr olunan “Garabagh war witnessed by women” ( “Qarabağ müharibəsi qadınların şahidliyi ilə”) və Sankt-Peterburqda çapdan çıxmış “Карабахская война: сражались и женщины” kitablarına görə Beynəlxalq Avrasiya Mətbuat Fondunun “Qarabağ” ali mükafatına layiq görülüb.
Milli mətbuatın inkişafında xidmətlərinə görə Z.Məhərrəmli Həsən bəy Zərdabi, “Qızıl qələm” media mükafatları və “Araz” Ali ədəbi mükafatı ilə təltif olunub. O, həmçinin Beynəlxalq Rəsul Rza və Şahmar Əkbərzadə mükafatlarının laureatıdır.
Vurğulanıb ki, Zemfira Məhərrəmli ümumtürk mədəniyyəti və ədəbiyyatı qarşısında xidmətlərinə görə beynəlxalq Mahmud Kaşğari mükafatı ilə də təltif edilib.
Daha sonra Əməkdar jurnalist, ictimai xadim və professor Qulu Məhərrəmli çıxış edərək onun yaradıcılıq yolundan söz açıb.
“Xalq qəzeti”nin baş redaktoru Əflatun Amaşov, Ahıl Jurnalistlər Məclisinin sədri, “Xalq qəzeti”nin baş redaktor müavini Tahir Aydınoğlu, “Yada düşdü” jurnalının baş redaktoru Nəzakət Məmmədova və digər çıxış edənlər Z.Məhərrəmlinin peşə fəaliyyəti, prinsipial mövqeyi, həm jurnalist, həm də bədii-publisistik qələm sahibi kimi xidmətləri barədə ürək sözlərini səsləndirib, xatirələrini bölüşüblər.
Tədbirdə Milli Məclisin İctimai Birliklər və Dini Qurumlar Komitəsinin eksperti Əkbər Qoşalı Z.Məhərrəmliyə komitə sədri Fazil Mustafanın təbrik məktubunu təqdim edib.
Tədbir çərçivəsində yazıçı-publisist, Əməkdar jurnalist Zemfira Məhərrəmliyə Mətbuat Şurasının diplomu təqdim olunub.
Mərasimin yekununda Zemfira Məhərrəmli göstərilən diqqət və səsləndirilən xoş sözlərə görə təşkilatçılara və tədbir iştirakçılarına təşəkkürünü bildirib.
Bölmənin digər xəbərləri
