Enerjinin tənzimlənməsinə dair əsas fəaliyyət istiqamətləri müzakirə olunur
Bakı, 24 oktyabr, AZƏRTAC
Bakıda Azərbaycan Enerji Məsələlərini Tənzimləmə Agentliyi (AERA) və Rumıniya Enerji Məsələlərini Tənzimləmə Təşkilatının (ANRE) birgə iştirakı ilə “Enerjinin tənzimlənməsinə dair əsas fəaliyyət istiqamətləri” mövzusunda üçgünlük seminar öz işinə başlayıb.
AZƏRTAC xəbər verir ki, seminar enerji sektorunda aparılan islahatlara dəstək məqsədilə enerji ilə bağlı proseslərin tənzimlənməsində beynəlxalq təcrübənin öyrənilməsi çərçivəsində keçirilir.
Enerji Məsələlərini Tənzimləmə Agentliyinin idarə heyətinin sədri Samir Axundov deyib ki, təmsil etdiyi qurum hazırda ölkədə kommunal xidmət səviyyəsinin yaxşılaşdırılması, dünya standartlarına uyğunlaşdırılması, enerji sektorunda restrukturizasiyanın aparılması, bazar münasibətlərinin tənzimlənməsi, istehlakçılar üçün fasiləsiz və keyfiyyətli enerji təchizatının təmin edilməsinə çalışır: “Həmin hədəflərə çatmaq üçün biz bu sahədə müsbət təcrübəyə və biliyə malik ölkələrlə əməkdaşlıq edirik. Bu baxımdan bugünkü tədbir vasitəsilə Rumıniya Enerji Məsələlərini Tənzimləmə Təşkilatı qabaqcıl təcrübənin öyrənilməsinə və bizim üçün yeni olan bu fəaliyyət sahəsinin qurulmasına töhfə verəcək”.
Rumıniya Enerji Məsələlərini Tənzimləmə Təşkilatının prezidenti Dumitru Kiritsa isə təşkilatın fəaliyyətindən, enerji sektorunun tənzimləmə prosesinin həyata keçirilməsi üçün vacib şərtlərdən danışıb.
Sonra enerjinin istehsalı, ötürülməsi və paylanması sahələrinin bir-birindən ayrılması, enerji sektorunun restrukturizasiyası, özəlləşdirilməsi və liberallaşdırılması, həmçinin elektrik enerjisi və qazın nəqli ilə bağlı tarif metodologiyası ətrafında müzakirələr aparılıb. Rumıniyada fəaliyyət göstərən tənzimləyici orqanın səlahiyyəti, müstəqilliyi və məsuliyyəti, həmçinin müzakirə olunan məsələlər üzrə təqdimatlar edilib.
Seminar elektrik enerjisi və qazın paylanmasına dair tarif metodologiyaları, elektrik enerjisi, qaz sektorlarında lisenziya, icazə və hüquqların verilməsi, eləcə də reaktiv enerjinin kompensasiyası ilə bağlı mövzuların müzakirəsi ilə davam etdiriləcək.
Xatırladaq ki, Prezident İlham Əliyev ötən il dekabrın 22-də “Azərbaycan Respublikası Energetika Nazirliyinin tabeliyində Enerji Məsələlərini Tənzimləmə Agentliyinin yaradılması haqqında” Fərman imzalayıb. Fərmana əsasən, Energetika Nazirliyinin Dövlət Enerji Nəzarəti İdarəsinin və Dövlət Qaz Nəzarəti İdarəsinin əsasında nazirliyin tabeliyində publik hüquqi şəxs statuslu Enerji Məsələlərini Tənzimləmə Agentliyi yaradılıb. Həmçinin Enerji Məsələlərini Tənzimləmə Agentliyinin Nizamnaməsi də təsdiq olunub. Agentlik dövlət qeydiyyatına alındığı gündən Energetika Nazirliyinin Dövlət Enerji Nəzarəti İdarəsi və Dövlət Qaz Nəzarəti İdarəsi, habelə onların yerli bölmələri ləğv edilib. Energetika Nazirliyinin Dövlət Enerji Nəzarəti İdarəsinin və Dövlət Qaz Nəzarəti İdarəsinin istifadəsində olan əmlakın agentliyin balansına verilib.
Enerji Məsələlərini Tənzimləmə Agentliyi Azərbaycanda elektrik və istilik enerjisi, habelə qaz təchizatı sahələrində istehsalçılar, ötürücülər, paylayıcılar, təchizatçılar və istehlakçılar arasında münasibətlərin tənzimlənməsini, müəssisələrin fəaliyyətinin təhlilini, restrukturizasiya tədbirləri ilə bağlı təkliflər verilməsini, investisiyaların cəlb edilməsi üçün stimullaşdırıcı mexanizmlər hazırlanmasını, mühəndis-kommunikasiya təminatı sistemlərinə və xidmətlərin keyfiyyətinə dair tələblərə əməl edilməsinə nəzarətin təşkilini həyata keçirir. Agentlik öz fəaliyyətində mütərəqqi korporativ idarəetmə standartlarını tətbiq edir və idarə heyəti tərəfindən idarə olunur. Enerji Məsələlərini Tənzimləmə Agentliyi Enerji Məsələlərini Tənzimləmə Orqanlarının Regional Birliyinin (ERRA) assosiativ üzvüdür.
Bölmənin digər xəbərləri
