Əqli Mülkiyyət Agentliyinin əməkdaşı regional vebinarda iştirak edib
Bakı, 2 iyun, AZƏRTAC
Ümumdünya Əqli Mülkiyyət Təşkilatı (ÜƏMT) tərəfindən “Patent Əməkdaşlığı Sazişi (PCT) və sənaye nümunələrinin beynəlxalq qeydiyyatı üzrə Haaqa Sistemi” mövzusunda regional vebinar keçirilib. Qafqaz, Mərkəzi Asiya və Şərqi Avropa ölkələrindən olan mütəxəssislər üçün onlayn rejimdə təşkil olunan tədbirdə Azərbaycan Respublikasının Əqli Mülkiyyət Agentliyinin tabeliyində olan Əqli Mülkiyyət Hüquqlarının Təminatı Mərkəzinin direktor müavini Rövşən Nəsirov iştirak edib.
Bu barədə AZƏRTAC-a Əqli Mülkiyyət Agentliyindən məlumat verilib. Bildirilib ki, vebinarda ÜƏMT-nın Rusiya Federasiyasındakı Ofisinin direktoru Pavel Spiçın və təşkilatın Qafqaz, Mərkəzi Asiya və Şərqi Avropa ölkələri bölməsinin rəhbəri İlya Qribkov çıxış ediblər. Həmçinin “Patent Əməkdaşlığı Sazişi Sistemi”, “Avrasiya patent sistemi çərçivəsində Patent Əməkdaşlığı Sazişinin tətbiqi” və “Haaqa sisteminə giriş” mövzularında təqdimatlar dinlənilib.
Tədbir zamanı Patent Əməkdaşlığı Sazişinə uyğun olaraq ixtiraların xarici ölkələrdə patentləşdirilməsinin əsas mərhələləri və Haaqa qeydiyyat sisteminə uyğun olaraq sənaye nümunələrinin qeydiyyatı haqqında məlumat verilib, iştirakçıların sualları cavablandırılıb.
Sonda vebinar iştirakçılarına, o cümlədən Azərbaycan nümayəndəsinə sertifikatlar təqdim olunub.
Bölmənin digər xəbərləri
