Ermənilər 18 il bundan əvvəl işğal etdikləri Ağdamın təbii sərvətlərinə qənim kəsilmişlər
Bakı, 23 iyul (AZƏRTAC). Ağdam rayonunun 88 min 395 hektar ərazisi - 1 şəhəri, 119 kənd və qəsəbəsi Ermənistan silahlı birləşmələri tərəfindən işğal olunmuşdur.
Çobandağ əhəngdaşı, Boyəhmədli və Şorbulaq gil yataqları işğal olunmuş ərazilərdə qalmışdır. Ağdam şəhərindəki yaşı 150-250 ilədək olan 14 Şərq çinarı, Boyəhmədli kəndi ətrafında isə yaşı 400 ilə çatan 71 Şərq çinarı təbiət abidəsi kimi qorunurdu.
Bu barədə AZƏRTAC-a Ekologiya və Təbii Sərvətlər Nazirliyindən (ETSN) məlumat verilmişdir. Bundan əlavə, ETSN-in operativ mərkəzi rayon ərazisində təbii sərvətlərin ermənilər tərəfindən talan olunmasına dair bir sıra faktlar aşkar etmişdir. Yaşı 400-ə çatan Şərq çinarları doğranaraq Ermənistana daşınmışdır. Erməni hərbçiləri işğal altındakı Novruzlu, Yusifcanlı, Mərzili, Baş Qərvənd, Kəngərli, Çəlik, Qaradağlı Kəngərlisi, Göytəpə, Gülçülük kəndlərində və Uzundərə, Yeddixırman, Şahbulaq dağ massivlərində 17 min 457 hektar otlaq sahəsini yandırmışlar. Nəticədə “Qırmızı kitab”a və Beynəlxalq Təbiəti Mühafizə İttifaqının “Qırmızı siyahısına” düşmüş müxtəlif sayda turac, qırqovul və gürzə məhv olmuşdur.
Xatırladaq ki, iyulun 23-də Ağdamın işğalından 18 il ötür.
Bölmənin digər xəbərləri
