SİYASƏT
Ermənistan beynəlxalq hüquqa hörmət etməlidir
Bakı, 24 oktyabr, AZƏRTAC
Azərbaycan Prezidenti İlham Əliyevin rəhbərliyi ilə ölkəmiz davamlı olaraq inkişaf edir, güclənir, regionda güc mərkəzinə çevrilir. Qazanılan uğurlar, otuz ilə yaxın işğal altında olan torpaqlarımızın işğaldan azad edilməsi regionda yeni reallıqlar yaradıb. Fərəhləndirici haldır ki, Prezident İlham Əliyevin rəhbərliyi altında regionda reallaşdırılan bütün beynəlxalq, irimiqyaslı layihələr Azərbaycanın iştirakı və milli maraqlarının nəzərə alınması ilə baş tutur. O cümlədən ölkəmizin beynəlxalq arenada əməkdaşlığı getdikcə genişlənib. Dövlətimizin başçısının dünyanın müxtəlif ölkələrinə səfərləri və bu səfərlər çərçivəsində keçirilən görüşlər, imzalanan sazişlər, müqavilələr və verilən bəyanatlar ölkəmizin gücünü, nüfuzunu göstərməklə yanaşı, ölkə həqiqətləri beynəlxalq tribunalardan səsləndirilir.
Bunu AZƏRTAC-a açıqlamasında Yeni Azərbaycan Partiyası (YAP) Nəsimi rayon təşkilatının sədri Azər Süleymanov söyləyib.
O bildirib ki, Azərbaycan Prezidenti İlham Əliyev oktyabrın 14-də Astanada Müstəqil Dövlətlər Birliyi Dövlət Başçıları Şurasının iclasındakı çıxışında regionda yaranan vəziyyətlə bağlı bir sıra əsas məsələləri diqqətə çatdıraraq, Azərbaycanın ərazilərinin erməni silahlı qüvvələri tərəfindən işğalı dövründə bu mövzunu MDB çərçivəsində heç vaxt müzakirəyə çıxarmadığını bildirib. Bunu münaqişənin nizamlanması ilə ATƏT-in Minsk qrupunun məşğul olması ilə əlaqələndirib: “O, mandata sahib idi. Təəssüf ki, 28 il ərzində Minsk qrupunun nəticəsi sıfıra bərabərdir. İndi göründüyü kimi, bu qurumun başlıca məqsədi münaqişənin nizamlanması yox, onun dondurulması idi. Danışıqların aparılması münaqişənin hələ uzun illər həll olunmaması üçün yalnız pərdə idi. Beləliklə, münaqişə həll olunub”.
YAP Nəsimi rayon təşkilatının sədri deyib ki, Azərbaycan beynəlxalq hüquqa, BMT-nin Nizamnaməsinə, o cümlədən hər bir ölkənin özünümüdafiə hüququna malik olmasını nəzərdə tutan BMT Nizamnaməsinin 51-ci maddəsinə uyğun olaraq münaqişəni özünün həll etdiyini diqqətə çatdıran dövlətimizin başçısı münaqişədən sonrakı vəziyyətin müxtəlif cür inkişaf etdiyini söyləyib. Həmkarlarını son dövrlər ərzində baş verənlərlə bağlı məlumatlandıran Prezident cari ilin sentyabrda baş verənlərə nəzər salaraq “Demək olar bir ay bundan əvvəl Azərbaycan-Ermənistan sərhədi ərazisində silahlı toqquşmalar baş verdi”, - deyə bildirib.
“Ermənistan tərəfindən minaların basdırılması və Azərbaycan tərəfinin çoxsaylı çağırışlarına baxmayaraq, dəqiq mina xəritələrinin təqdim edilməməsi beynəlxalq humanitar hüquqa zidd olmaqla, insanların hüquqlarının pozulmasına gətirib çıxarıb. Minaların yaratdığı təhlükə ciddi narahatlıq yaradır. Ermənistan beynəlxalq hüquqa hörmət etməlidir və beynəlxalq təşkilatlar buna ədalətli yanaşmalıdır”, - deyə A.Süleymanov qeyd edib.
Onun sözlərinə görə, Astanada MDB Dövlət Başçıları Şurasının iclasında Prezident İlham Əliyev çıxışı zamanı regionumuzda baş verən proseslər, Azərbaycanla Ermənistan arasında münasibətlərin normallaşdırılması istiqamətində aparılan danışıqlar ətrafında fikirlərini davam etdirərək, 2020-ci ilin noyabrında Rusiya Federasiyasının vasitəçiliyi ilə üçtərəfli Bəyanatın qəbul edildiyini xatırladıb. Dövlətimizin başçısı ölkəmizin Bəyanatın bütün müddəalarını yerinə yetirdiyini, o cümlədən Ermənistandan Qarabağa maneəsiz girişi təmin etdiyini qeyd edib. Çıxışının sonunda Qarabağ ermənilərinin taleyi məsələsinə diqqəti çəkən Prezident İlham Əliyev Azərbaycanın mövqeyinin aydın və dəqiq olduğunu bir daha vurğulayıb.