Ermənistanın ərazi iddiaları işğalçılıq siyasətidir
Bakı, 3 oktyabr, AZƏRTAC
Bakı Beynəlxalq Multikulturalizm Mərkəzinin icraçı direktoru Rəvan Həsənov Ermənistanın sentyabrın 27-də növbəti təxribatı nəticəsində baş verən müharibənin son günlər ermənilərin əsassız olaraq iddia etdikləri dini və etnik müstəviyə keçirmək cəhdlərinə münasibət bildirib.
Mərkəzdən AZƏRTAC-a bildiriblər ki, R. Həsənov son zamanlar xüsusilə bir sıra beynəlxalq media orqanlarında Ermənistan-Azərbaycan Dağlıq Qarabağ münaqişəsinə yanaşmada iki meylin müşahidə olunduğunu bildirib. Diqqətə çatdırıb ki, tərəflər bu münaqişəni ya dini müstəviyə keçirməyə çalışır, ya da onun “etnik zəmində” baş verdiyini iddia edirlər. Məqsəd münaqişəyə daha çox tərəf cəlb etmək və ictimai şüurun manipulyasiyası yolu ilə konfessional fərqləri qabartmaqla beynəlxalq ictimaiyyəti, xüsusilə Qərb dünyasını guya “xristian ermənilərin müsəlmanlar tərəfindən yenidən soyqırıma məruz qalması” mifini təlqin etməkdir.
Məhz bu səbəbdəndir ki, sentyabrın 27-dən - Ermənistanın Azərbaycan mülki əhalisini artilleriya atəşinə tutmağa başladığı vaxtdan etibarən Qərb mediasına nüfuz etdirilən daha iki iddia özünü qabarıq göstərməkdədir - “Türkiyənin hərbi qulluqçuları Azərbaycan tərəfindən hərbi əməliyyatlarda iştirak edirlər” və “Azərbaycan döyüşlərdə radikal islamçı və terrorçu qruplaşmalardan istifadə edir”. Əslində bu iddiaları sübut edə biləcək hər hansı bir faktoloji material mövcud deyil. Əksinə, son zamanlar Rusiya mediası terrorçu kürd PKK qruplaşmasının Ermənistan tərəfindən vuruşmasını “milli ruhun dirçəlişi kimi” qiymətləndirir. Sözügedən qruplaşmanın beynəlxalq ictimaiyyət tərəfindən terror təşkilatı kimi qəbul edilməsinə baxmayaraq, bu fakta göz yumulur. Sonuncu fəal döyüşlərin Qərb və Rusiya mediasında şərhinin təhlili zamanı beynəlxalq hüququn Azərbaycana verdiyi hüquq və səlahiyyətlər çərçivəsində öz ərazisini terrorçu qruplaşmalardan təmizləməsi ilə bağlı faktlar bilərəkdən gizlədilir, eyni zamanda, münaqişənin tarixi və səbəbləri qəsdən saxtalaşdırılır.
Bu fikirləri bildirməkdə məqsəd heç də təəccüb hissi deyil. Bu böhtan kampaniyası onsuz da proqnozlaşdırılırdı. Eləcə də münaqişənin guya dini zəmində baş verməsi haqqında iddialar da xəstə təxəyyülün nəticəsidir. Çünki Azərbaycanda din və təriqətlər, onların nümayəndələri arasında heç bir narahatlığa səbəb yoxdur və bundan sonra da olmayacaq. Fərqli dinlərin nümayəndələri hər hansı bir maneə ilə üzləşmədən, sərbəst şəkildə ibadətlə məşğul olur, dini ayinlərini icra edirlər. Dini ibadət yerlərinin hər biri dövlətin bilavasitə dəstəyi ilə qorunub, təmir olunur və ya yeniləri inşa edilir.
Digər sərsəm təbliğatçılar qrupunun iddialarına əsasən, Ermənistan-Azərbaycan Dağlıq Qarabağ münaqişəsi etnik xarakterlidir. Təxribat məqsədi daşıyan bu iddianı “gücləndirmək” məqsədilə Ermənistan rəsmiləri Azərbaycanda yaşayan müxtəlif xalqların nümayəndələrinə çağırışlar etməyə çalışıb, lakin əks-reaksiya ilə üzləşiblər. Etnik və dini kimliyindən asılı olmayaraq, bu gün bütün azərbaycanlılar çiyin-çiyinə azğın düşmənə qarşı mübarizə aparırlar.
Qarabağda yaşayan etnik ermənilərə gəldikdə isə bildiririk ki, Ermənistan sizi “dönmə” (şurtvats) kimi tanıyır və münaqişədə qurbanlıq kimi istifadə edir. Bir dəfə yaşayacağınız həyatda siyasi iddiaların, maraqların qurbanlarına çevrilməyin! Bu gün Ermənistandan fərqli olaraq, Azərbaycan monoetnik dövlət deyil və davamlı olaraq multikulturalizm siyasətini yürüdür. Azərbaycanın haqlı mübarizəsi nə dini, nə də etnik zəmindədir. Bunu sadəcə olaraq, Azərbaycanın tarixinə, dövlətimizin dini və etnik rəngarəngliyinə baxmaqla sübut etmək mümkündür. Ermənistan-Azərbaycan Dağlıq Qarabağ münaqişəsinin səbəbi Ermənistanın ərazi iddiaları və işğalçılıq siyasətidir. Erməni silahlı birləşmələrinin Azərbaycan ərazisini işğal etməsi və bir milyondan çox vətəndaşımızın oradan qovulması beynəlxalq cinayətdir. Bunu sübut edəcək yüzlərlə sənəd və fakt mövcuddur. Ancaq görünən odur ki, otuz ilə yaxın müddətdə məsələ heç də ədalətli həllini tapa bilməyib.
Sonda R. Həsənov deyib ki, bundan sonra Azərbaycan diplomatiyası ölkəmizə qarşı olan bu yanaşmanı nəzərə almalı və fəaliyyətini buna uyğun qurmalıdır. “Mən əminəm ki, bu hibrit və çoxvektorlu savaşda qələbə bizim olacaq. Hər bir azərbaycanlı bunu özünə şərəf mübarizəsi kimi görməlidir. Qarabağ Azərbaycandır!”, - deyə icraçı direktor bildirib.
Bölmənin digər xəbərləri
