ESTONİYADA YAŞAYAN HƏMVƏTƏNLƏRİMİZİN BÖYÜK PLANLARI
Tallinn, 12 yanvar (AZƏRTAC). Estoniyanın novosti.err.ee internet-portalının verdiyi xəbərə görə, Tallinndə Uşaq Ədəbiyyatı Mərkəzində həmin ölkənin Mədəniyyət Nazirliyi nəzdindəki Milli Azlıqlar Şurası üzvlərinin şərəfinə yeni il qəbulu təşkil edilmişdir.
Estoniyanın mədəniyyət naziri Layne Yanes bildirmişdir ki, Köhnəşəhərdəki bu uşaq kitabı evi görüş üçün təsadüfi seçilməmişdir. 2010-cu il Mədəniyyət Nazirliyi tərəfindən “Qiraət ili” elan edilmişdir. Hər şey isə nağıldan və uşaq kitablarından başlayır. Xanım Yanes demişdir: “İstəyirik ki, Estoniyada yaşayan müxtəlif xalqların nümayəndələri öz doğma dillərində daha çox ədəbiyyat nümunələri oxusunlar”.
Türk Xalqları Assosiyasının prezidenti Yaqub Yaqubov bu ilin birinci rübündə Azərbaycan alimləri və yazıçıları ilə keçiriləcək görüş barədə məlumat vermişdir. Cari ildə, həmçinin Qafqaz xalqları poeziyası gecəsi keçiriləcəkdir. İyun ayında Milli Kitabxanada Azərbaycan rəssamı Marqarita Kərimovanın sərgisi təşkil ediləcəkdir.
Zeynal Ağazadə
AZƏRTAC-ın xüsusi müxbiri
Tallinn
Bölmənin digər xəbərləri
