“Ətraf mühitin qorunmasında gənclərin rolunun artırılması” layihəsi başa çatmışdır
Bakı, 27 iyul (AZƏRTAC). İyulun 27-də Azərbaycan Ekologiya Standartlarının Monitorinq Fondunun təşkilatçılığı ilə “Ətraf mühitin qorunmasında gənclərin rolunun artırılması” layihəsi çərçivəsində “dəyirmi masa” keçirilmişdir.
AZƏRTAC xəbər verir ki, Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyəsi ilə həyata keçirilən layihənin məqsədi ətraf mühitin qorunmasının təbliği, ekoloji biliyin yayılması, gənc nəsli Azərbaycanın və dünyanın qlobal ekoloji probleminin həllində fəal iştiraka cəlb etməkdir.
Layihənin icraçı direktoru Rüstəm Əliyev bildirmişdir ki, beynəlxalq və yerli təşkilatlar ilə əlaqələr yaratmaqla onların qabaqcıl iş təcrübəsinin tətbiqi istiqamətində müəyyən işlər görülməlidir. Bildirilmişdir ki, gənc nəsil ilk növbədə ekoloji biliklərə yiyələnməlidir. Gənclərimiz ətraf mühitin qorunması ilə əlaqədar əməli fəaliyyət və maarifləndirici tədbirlərlə öndə getməlidirlər. Buna görə də ətraf mühitin qorunmasının təbliği, ekoloji biliyin yayılması məqsədi ilə maarifləndirici konfranslar, ekoloji gəzintilər təşkil edilməlidir.
Xatırladaq ki, may ayından başlamış layihə çərçivəsində 10 təlim keçirilmişdir.
Bölmənin digər xəbərləri
