Bakı, 2 mart, Leyla Qurbanova, AZƏRTAC

Şahmatçılarımız “Aeroflot open” beynəlxalq festivalında böyük uğura imza ataraq qızıl və bürünc medallar qazandılar.

Bu sözləri şahmat üzrə yeniyetmələrdən ibarət yığma komandanın baş məşqçisi, qrossmeyster Fərid Abbasov Moskvada keçirilmiş “Aeroflot open” yarışında azərbaycanlı şahmatçıların nəticələri ilə bağlı AZƏRTAC-a məxsusi müsahibəsində deyib. O, yarışın güclü A turnirində azərbaycanlı şahmatçıların birinci və ikinci yerlər uğrunda mübarizə aparmalarının xüsusilə qürurverici olduğunu bildirib. Baş məşqçi qeyd edib ki, bir şahmatçı istisna olmaqla turnirdə bütün şahmatçılarımız yaxşı oynayaraq reytinqlərini yüksəldiblər.

Rauf Məmmədov güclü potensiala malik şahmatçıdır

Qrossmeyster Rauf Məmmədovun turnirdə mükəmməl oyun nümayiş etdirdiyini bildirən F.Abbasov deyib: “Şahmatçılarımızın bu güclü turnirdə birinci və ikinci yerlər uğrunda mübarizə aparmaları, xüsusilə qürurverici idi. Tərkibinə görə heç də Avropa çempionatlarından geri qalmayan bu yarışda ilk onluğa düşmək böyük nəticədir. Təmsilçilərimizdən təcrübəli şahmatçı, qrossmeyster R.Məmmədovun nəticəsini xüsusi qeyd etmək istəyirəm. Birinci turdan mükəmməl oyun nümayiş etdirən şahmatçımızın güclü potensialı var. O, komandamızın tərkibində üç dəfə Avropa çempionatının mükafatçısı olub. Sonuncu dəfə komandamızın Avropa çempionu olmasında onun böyük rolu olub. Şahmatçının əsl gücü, potensialı hazırkı reytinqini əks etdirmir. O, 2700 reytinqdən yuxarı səviyyədə oyun nümayiş etdirən şahmatçı olduğunu dəfələrlə sübuta yetirib. Rauf “Aeroflot open”də birinci turdan sona qədər liderlər qrupunda mübarizə apardı, nəticədə üçüncü yeri tutdu. O, öz potensialından maksimum istifadə edərsə daha böyük nəticələr əldə edə bilər”.

Aydın Süleymanlı “Aeroflot open”də sensasiya ilə yadda qaldı

Fərid Abbasov bildirib ki, dünya şahmat ictimaiyyəti son vaxtlar daha bir şahmatçının sürətli yüksəlişinə şahidlik edir. On dörd yaşlı təmsilçimiz, dünya çempionu Aydın Süleymanlının turnirin güclü A turnirində sensasiya etdiyini vurğulayan baş məşqçi diqqətə çatdırıb ki, A.Süleymanlı bütün turlarda reytinqi 2600-dən yuxarı olan şahmatçılarla qarşılaşmaları özünəməxsus təmkinliklə və yüksək səviyyəli oyun nümayiş etdirməklə başa çatdırdı. Xüsusilə birinci turda uzun illər Serbiya yığma komandasında çalışan, böyük təcrübəyə malik və bir çox elit turnirlərin qalib və mükafatçısı Aleksandar İndjiç ilə qarşılaşmasını qalib başa vurması onun güclü iddiaçılardan biri olduğunu göstərir. Eləcə də beşinci turda böyük üstünlüklərə malik olan erməni rəqibi ilə qarşılaşmada nümayiş etdirdiyi oyun diqqəti cəlb etdi. Aydının turnirdə daha bir güclü rəqiblə - hindistanlı həmyaşıdı, 18 yaşadək oğlanlar arasında dünya çempionu Rameşbabu Praqnanandha ilə qarşılaşması böyük maraq kəsb edirdi. Oyunun əvvəlində Aydın üstünlük qazansa da, sonra vəziyyət dəyişdi və rəqib üstünlüyü ələ aldı. Daha sonra təmsilçimiz çox gözəl müdafiə resurslarını tapıb vəziyyəti öz xeyrinə dəyişdi. Sonda elə alındı ki, R.Praqnanda heç-heçə etməsəydi vəziyyət onun üçün daha da pis olacaqdı. Bu oyundan sonra Aydının özünə inamı daha da artdı. Yeddinci turda daha bir təcrübəli şahmatçı, uzun müddət İsrail yığma komandasının üzvü, müasir nəzəriyyədə qədim hind müdafiəsinin mahir bilicisi sayılan və bir sıra nüfuzlu turnirlərin qalib və mükafatçısı İlia Smirin ilə şahmatçımızın qarşılaşması uğurla başa çatdı. Səkkizinci turda Aydın həm psixoloji, həm texniki baxımdan çox güclü olan iranlı Pərham Maqsudluya qarşı oynadı. Kompüterə yaxın oyun oynayan gənc və çox istedadlı qrossmeysterlərdən biri olan P.Maqsudlunun özünəməxsus oyun üslubu var. Şübhəsiz, onun da zəif nöqtələri var idi və Aydın bu şansdan yetərincə bəhrələndi. Şahmatçımız bu yarışda qalib olmaqla, həm də Dortmund turnirinə vəsiqə əldə etdi.

Məhəmməd Muradlı, Vüqar Əsədli və digər şahmatçılarımız

da turnirdə yüksək səviyyədə çıxış etdilər

Baş məşqçi qeyd edib ki, “Aeroflot open” turnirində Vüqar Əsədli, Məhəmməd Muradlı və digər şahmatçılarımız da yüksək səviyyədə çıxış ediblər. Festivalın A turnirində mübarizə aparan on doqquz yaşlı şahmatçımız Vüqar Əsədlinin son turlarda qələbə ilə nəticələnən oyunlarını xüsusilə yüksək qiymətləndirmək olar. Beynəlxalq qrossmeyster 6 xalla altıncı yeri tutdu. O, həm hücumda, həm müdafiədə gözəl oynadı. Bu turnirdə qrossmeyster, beynəlxalq usta Abdulla Qədimbəyli də yaxşı oynayaraq reytinqini artırmağa müvəffəq oldu.

Festivalın B turnirində isə Məhəmməd Muradlının oyununu xüsusi qeyd etmək istəyirəm. O, yarışda dördüncü yerə çıxdı. Oyunda göstərdiyi performans isə 2600-dən yuxarı oldu. Şahmatçı yarışda göstərdiyi nəticələrə görə, növbəti beynəlxalq qrossmeyster balını topladı. Məhəmməd Muradlı kişilər arasında hazırkı Azərbaycan çempionudur. On iki yaşadək oğlanlar arasında dünya çempionu olub. M.Muradlı bir sıra yarışlarda, o cümlədən ötən il Türkiyənin Çorum şəhərində keçirilən olimpiadada komandanın birinci taxtasında çox gözəl oyun nümayiş etdirdi. Festivalın B qrupunda daha bir şahmatçımız - Read Səmədov da yaxşı oynadı və reytinqini artırdı.

Fərid Abbasov Moskvada keçirilmiş “Aeroflot open”də əldə edilmiş yüksək nailiyyətin Azərbaycan şahmat məktəbinin növbəti uğuru olduğunu vurğulayıb.