FIFA Antonio Rüdigerin irqçiliyə məruz qalması iddiası ilə bağlı araşdırma aparır
Berlin, 25 iyun, AZƏRTAC
FIFA Madridin “Real” futbol klubunun almaniyalı müdafiəçisi Antonio Rüdigerin klublararası dünya çempionatında irqçiliyə məruz qalması iddiası ilə bağlı araşdırma aparır.
AZƏRTAC “Spiegel” qəzetinə istinadla xəbər verir ki, bu barədə Almaniyanın DPA agentliyinin sorğusuna cavab olaraq FIFA-dan bildirilib.
“Real”ın müdafiəçisi ABŞ-da keçirilən çempionatın qrup mərhələsində Meksikanın “Paçuka” komandası ilə görüşdə rəqib futbolçu Qustavo Kabral tərəfindən irqçi ifadələrlə təhqir olunduğunu iddia edib. FIFA-nın intizam komitəsi məsələ ilə əlaqədar Qustavo Kabral barəsində araşdırma başladıb.
Kral klubunun baş məşqçisi Xabi Alonso futbolçusunu müdafiə edib və araşdırmanın nəticəsini gözlədiklərini bildirib: “Bu, qəbuledilməzdir və biz onun dediklərinə inanırıq”.
Q.Kabral isə oyundan sonra ittihamı rədd edərək, A.Rüdigerlə bağlı hər hansı irqçi ifadə işlətmədiyini, sadəcə, “Lənətə gəlmiş, qorxaq“ dediyini bildirib.
Qeyd edək ki, matçın əlavə vaxtında A.Rüdiger ilə Q.Kabral arasında mübahisə yaşanıb. Bundan sonra əsəbiləşmiş A.Rüdiger braziliyalı baş hakim Ramon Abatti ilə danışıb. Hakim isə ona xüsusi işarə ilə cavab verib. Hadisədən sonra qarşılaşma qısa müddətlik dayandırılıb.
Elvin Mövsüm
AZƏRTAC-ın xüsusi müxbiri
Berlin
Bölmənin digər xəbərləri
