Firuddin Nəbiyev: Vətən müharibəsi qazilərinin müalicəsi ciddi nəzarətdə saxlanılır
Bakı, 3 aprel, AZƏRTAC
Vətən müharibəsində şəhidlərimiz, yaralılarımız olub. Yaralı hərbçilərin tezliklə sağalması üçün əlimizdən gələni edirik. Döyüşlərin davam etdiyi dövrlərdə qoşunlarımız irəlilədikcə işğaldan azad edilən ərazilərdə mobil hospitallar yaradılıb, yaralılara müvafiq tibbi yardım göstərilib. İxtisaslı müalicəyə ehtiyacı olanlar isə Baş Klinik Hospitala köçürülüb.
AZƏRTAC xəbər verir, bu barədə Müdafiə Nazirliyinin Tibb Baş İdarəsinin rəisi vəzifəsini icra edən tibb xidməti polkovniki Firuddin Nəbiyev Silahlı Qüvvələrin Baş Klinik Hospitalında hərbi həkimlərin Vətən müharibəsi dövründə və işğaldan azad edilmiş ərazilərdə hazırkı fəaliyyəti ilə bağlı keçirilən brifinqdə deyib.
F.Nəbiyev qeyd edib ki, müharibə dövründə Tibbi Ərazi Bölmələrini İdarəetmə Birliyi ilə (TƏBİB) də sıx əməkdaşlıq etdik, ərazilərdə yerləşən xəstəxanaların, o cümlədən özəl klinikaların həkimləri hərbçilərimizin müalicəsinə yaxından dəstək göstərdilər.
Bildirilib ki, Vətən müharibəsində yaralanan qazilərdən 59-nun müalicəsi hazırda davam etdirilir. Həmin qazilər Baş Klinik Hospitalında və Bilgəhdəki hospitalda müalicə alırlar.
Məlumat verilib ki, müalicəsi başa çatan 200-ə yaxın hərbi qulluqçunun sənədləri Əmək və Əhalinin Sosial Müdafiəsi Nazirliyinə göndərilib və onlara sosial müavinət təyin olunub. Hazırda tərxis olunmayan, ev şəraitində müalicə almaq istəyən qazilərin bəzilərinə məzuniyyət verilib. Məzuniyyətdə olduqları dövrdə də onların tibbi təminatı hospital tərəfindən həyata keçirilir. Yüksək rütbəli zabitlərin, gizirlərin, habelə müəyyən səbəblərə görə tərxisə buraxılmış zabitlərin tibbi təminatı da bizim üzərimizə düşür.
Qazilərin hospitallarda müalicəsinin daha məqsədəuyğun olduğunu vurğulayan polkovnik qeyd edib ki, hazırda orduda tibbi təminat və dərmanlarla təchizatla bağlı hər hansı problem yoxdur. Bütün hərbi qulluqçuların müalicəsi ciddi nəzarətdə saxlanılır.
Qazilərin xaricdə və ölkəmizdəki klinikalarda müalicəsi məsələsinə toxunan Firuddin Nəbiyev bildirib ki, “YAŞAT” Fondu bu istiqamətdə lazımi tədbirlər görür. Fondun dəvəti ilə Türkiyədən gələn həkimlər müalicə prosesində iştirak edir, yaxud müalicə üçün xaricə göndərilməli olan qazilər müəyyənləşdirilir. İndiyədək 54 qazi Türkiyəyə müalicəyə göndərilib, onlardan 4-ü sağalaraq geri qayıdıb. Bununla bağlı işlər hazırda da davam etdirilir.
Brifinqdən sonra jurnalistlər hospitalda qazilərin reabilitasiya prosesi ilə tanış olub, onlarla söhbət ediblər. Müalicə olunan hərbi qulluqçular onlara göstərilən diqqət və qayğıdan, eləcə də yaradılan şəraitdən razılıqlarını bildiriblər.
Bölmənin digər xəbərləri
