FÖVQƏLADƏ HALLAR NAZİRİ ABŞ SƏFİRİ İLƏ GÖRÜŞMÜŞDÜR
Səfiri yeni təyinatı münasibətilə təbrik edən Kəmaləddin Heydərov Azərbaycan ilə ABŞ arasında ikitərəfli əlaqələrin strateji tərəfdaşlıq səviyyəsinə qalxdığını diqqətə çatdırmışdır. Azərbaycan Prezidenti İlham Əliyevin aprel ayında Amerika Birləşmiş Ştatlarının Prezidenti Corc Buşun dəvəti ilə bu ölkəyə səfərinin əlaqələrin daha da möhkəmlənməsinə səbəb olduğunu bildirən nazir, respublikamızda irimiqyaslı layihələrin gerçəkləşməsində ABŞ-ın rolunu yüksək qiymətləndirmişdir.
Xanım Ann Ders Azərbaycanın Amerika Birləşmiş Ştatları ilə geniş əməkdaşlıq etdiyini bildirərək, əlaqələrin bugünkü səviyyəsi ilə bağlı fikirlərini açıqlamış, münasibətlərin davamlı olaraq inkişaf edəcəyinə əminliyini bildirmişdir. Yeni yaradılan Fövqəladə Hallar Nazirliyinin məqsədləri, ötən müddətdə qurumun formalaşdırılması istiqamətində görülən işlərlə maraqlanan xanım Ann Ders, belə bir faktı da diqqətə çatdırmışdır ki, Amerika Birləşmiş Ştatlarında Daxili Təhlükəsizlik Nazirliyinin tərkibində fövqəladə hallarla məşğul olan agentlik fəaliyyət göstərir. Mühüm vəzifələrin öhdəsindən gəlmək üçün hər iki tərəfin təcrübəsinin öyrənilməsi faydalı ola bilər.
Azərbaycan Prezidenti İlham Əliyevin müvafiq Sərəncamı ilə ötən ilin dekabr ayında yaradılan nazirliyin formalaşması istiqamətində görülən işlərlə bağlı amerikalı diplomata məlumat verən Kəmaləddin Heydərov, bu sahədə beynəlxalq təcrübənin tətbiqinə ciddi fikir verildiyini, ABŞ-ın təcrübəsinin də öyrənildiyini bildirmiş, fövqəladə hallar sahəsində yaranan problemlərin dərhal aradan qaldırılması üçün işlərin mərkəzləşdirilmiş qaydada həyata keçirilməsini mühüm addım kimi qiymətləndirmişdir.
Görüşdə qarşılıqlı maraq doğuran məsələlər ətrafında geniş fikir mübadiləsi aparılmışdır.
Bölmənin digər xəbərləri
