Fransa Bankının rəhbəri: Siyasi xaosdan bezmişəm
Paris, 10 oktyabr, AZƏRTAC
Fransa Bankının rəhbəri Fransua Vilerua dö Qalo ölkədəki siyasi vəziyyətə dair sərt açıqlama verib. O, Fransada baş verən “siyasi israf və xaosdan” artıq bezdiyini bildirib və ölkənin mövcud böhrandan çıxması üçün siyasi qüvvələri kompromisə gəlməyə çağırıb.
AZƏRTAC xəbər verir ki, Fransa Bankının rəhbəri bu fikirləru RTL radiosuna deyib. “Mən də bütün fransızlar kimi vətənimi sevirəm və bu siyasi xaosdan artıq bezmişəm”, - deyə o, Fransanın sabitliyə qayıtması üçün kompromislər və koalisiyaların zəruriliyini bildirib.
“Kompromis təhqir deyil. Artıq vaxt çatıb ki, siyasi partiyalar bir araya gəlib məsuliyyətli qərarlar versinlər”, - deyə Vilerua dö Qalo AFP-yə də açıqlamasında vurğulayıb.
Bu çağırış Prezident Emmanuel Makronun Milli Assambleyanı buraxmasından sonra ölkədə yaranan siyasi qeyri-müəyyənlik fonunda verilib. Hazırda Fransa hökuməti yeni baş nazirin təyinatı və sabitliyin bərpası istiqamətində çıxış yolu axtarır. Fransa Bankının rəhbərinin bu cür siyasi açıqlama ilə çıxış etməsi isə vəziyyətin ciddiliyini bir daha ortaya qoyur.
Bölmənin digər xəbərləri
