Fransanın 44 təşkilatı hökumətdən Aİ-MERCOSUR razılaşmasının qarşısını almağı tələb edir
Paris, 28 oktyabr, AZƏRTAC
Avropa İttifaqı (Aİ) ilə MERCOSUR (Cənubi Amerika ölkələrinin iqtisadi ittifaqı) arasında imzalanması planlaşdırılan azad ticarət sazişi ilə bağlı Fransa daxilində gərginlik artır.
AZƏRTAC xəbər verir ki, 44 ictimai təşkilat və həmkarlar ittifaqı, eləcə də “Confederation Paysanne”, CGT, “Greenpeace” və “France Nature Environnement” (FNE) kimi həmkarlar ittifaqları Fransa Prezidenti Emmanuel Makrona açıq məktub göndərərək, ölkənin mövqeyini aydınlaşdırmağa və sazişin təsdiqini bloklamağa çağırıblar.
Bu çağırış Fransa rəhbərliyinin son aylarda sazişə münasibətin dəyişdiyi bir vaxtda edilib. Fevral ayında Makron Kənd Təsərrüfatı Sərgisi zamanı Aİ-MERCOSUR razılaşmasını “pis sənəd” adlandırıb, həmçinin onun ratifikasiyasını dayandırmaq üçün Aİ daxilində “bloklama azlığı” yaratmağa çalışdığını deyib. Lakin oktyabrın sonlarında Makronun bəyanatları daha yumşaq səslənib. O bildirib ki, Avropa Komissiyasının təqdim etdiyi yeni düzəlişlər doğru addımdır, çünki onlar Avropa istehsalçılarını və istehlakçılarını qorumağa yönəlib. Bu açıqlama, sazişə qarşı çıxan təşkilatlarda ciddi narazılıq yaradıb. Onların fikrincə, Fransa hökuməti öz qırmızı xəttindən geri çəkilir və bu düzəlişlər mahiyyət etibarilə heç nəyi dəyişmir.
Təşkilatlar bugünkü məktublarında Yelisey sarayından gələn yumşaq reaksiyalara görə dərin narahatıq və çaşqınlıq içində olduqlarını yazıblar. Onların məktubu Baş nazir Sebastyan Lökornüyə və bir neçə nazirə də göndərilib.
Kənd təsərrüfatı assosiasiyaları Avropa Komissiyasının MERCOSUR razılaşması ilə bağlı qoruyucu mexanizmlərini müvəqqəti və qeyri-effektiv hesab edirlər. Onların fikrincə, bu tədbirlər Braziliya, Argentina, Uruqvay və Paraqvaydan gələcək ucuz məhsul axınını dayandıra bilməyəcək.
Cari ilin aprel-iyun aylarında aparılmış “Cevipof” və “Agro Toulouse” sorğusuna əsasən, Fransadakı fermerlərin 80 faizi Aİ-MERCOSUR azad ticarət razılaşmasını Fransa kənd təsərrüfatına ciddi təhdid kimi qiymətləndirir. Onların narahatlığı əsasən ucuz ət və soya idxalı, həmçinin ekoloji standartlara əməl olunmaması ilə bağlıdır.
Avropa Komissiyası MERCOSUR sazişinin dekabrın 19-da imzalanmasını planlaşdırır. Almaniya Kansleri Fridrix Mersin sözlərinə görə, bu tarix yalnız Aİ-nin 27 üzvünün yekun razılığı halında qüvvəyə minəcək. Lakin Fransanın mövqeyi hələ də qeyri-müəyyəndir. 44 təşkilatın məktubunda qeyd olunur ki, 2024-cü ilin dekabrından bəri sənədin məzmununda heç bir əsas dəyişiklik edilməyib, buna görə də Fransa hökumətinin yumşalan mövqeyi izaholunmazdır. Hazırkı vəziyyətdə Emmanuel Makronun “açıq dəstəyi” və ya “bloklama təşəbbüsü” arasında verəcəyi qərar Aİ-MERCOSUR sazişinin taleyini müəyyən edəcək əsas amil kimi dəyərləndirilir.
Bölmənin digər xəbərləri
