Fransanın təşəbbüskarı olduğu birgə bəyanat əsassız və böhtan xarakterlidir
Bakı, 13 oktyabr, AZƏRTAC
“Azərbaycana qarşı ikilistandartlı və qərəzli siyasət davam etdirilir. Konkret olaraq başda Fransa olmaqla bəzi Qərb ölkələri Azərbaycanın Zəfərini həzm edə bilmir və bu səbəbdən də müxtəlif siyasi-diplomatik yollarla ölkəmizə təzyiqlər etməyə çalışırlar. Elə ötən gün Fransanın təşəbbüsü ilə bir qrup dövlətin BMT-nin İnsan Hüquqları Şurasında Azərbaycan əleyhinə birgə bəyanat vermələri də bunun əyani sübutudur”. Bunu AZƏRTAC-a Yeni Azərbaycan Partiyası Nizami rayon təşkilatının sədri Ramil Vəlibəyov deyib.
Ramil Vəlibəyov bildirib ki, bəyanatda Azərbaycanın Qarabağ bölgəsindən ermənilərin köçməsinin səbəblərinə dair səslənən iddialar əsassız və böhtan xarakterlidir: “Bəyanatın əsassız və qərəzli olmasını isbatlayan başlıca amil odur ki, Fransa uzun illər ərzində ermənilərə təbliğ edilmiş etnik dözümsüzlükdən, Ermənistanın reinteqrasiya proseslərinə mane olmaq cəhdlərindən, eləcə də Ermənistandan qovulmuş azərbaycanlıların qayıdış hüququndan bəhs etmək fikrindən uzaq olduğunu nümayiş etdirir. Baxmayaraq ki, Ermənistanın işğalçılıq siyasətinin nəticəsində bir milyona yaxın azərbaycanlı öz doğma torpaqlarından qovulub və hazırda onlardan cəmi bir neçə mini doğma Vətəninə qayıdıb, yüz minlərlə insan isə hələ də köçkün həyatı yaşayır, nədənsə sənəddə bunlar haqqında heç nə deyilmir. Qaçqınlıq, məcburi köçkünlük, etnik təmizləmə, soyqırımı kimi tarixi hadisələr Azərbaycan xalqının yaşadığı faktlardır. Hansı səbəbdən Fransa bunlara göz yumur? Bəs, Qarabağdan könüllü şəkildə köçən ermənilərə “qaçqın statusu”nun verilməsi hansı məntiqə sığır? Könüllü şəkildə bir ərazidən digərinə köçən insan miqrasiya edirsə, bunu “qaçqın” kimi təqdim etmək doğrudurmu? Əlbəttə ki, xeyr. Məsələn, hər il Ermənistandan 10-15 min insan xaricə köçür. İndi onlara “qaçqın” demək hansı hüquqa sığar? Bu müqayisə elə Qarabağdan köçən ermənilərə də aiddir. Qarabağdan köçmüş ermənilərdən 10 mindən çoxu Ermənistan silahlı qüvvələrinin hərbçiləri və onların ailə üzvləridir. Digərlərinin mütləq əksəriyyəti isə işğal zamanı burada qanunsuz məskunlaşmış şəxslərdir. Belə çıxır ki, Fransa və digər Qərb ölkələri faktiki olaraq qanunsuz məskunlaşmaya da bəraət qazandırırlar”.
“Fransa azərbaycanlılara qarşı ayrı-seçkiliklə və Azərbaycanın ünvanına əsassız ittihamlarla bölgədə gərginliyi artırmaq və sülh prosesini pozmaq niyyətindədir”, - deyən Ramil Vəlibəyov əlavə edib ki, Fransanın qərəzli və əsassız bəyanatına qoşulan ölkələrin bir çoxu da digər dövlətlərə və xalqlara qarşı dəfələrlə çoxsaylı cinayətlər törədiblər: “Fransanın Əlcəzairdə ərəblərə, müsəlmanlara, Almaniyanın yəhudilərə, ABŞ-ın qaradərililərə və hindulara qarşı törətdiyi qətliamları, soyqırımı aktları tarixin qanlı ləkəsi kimi yaddaşlardadır. Bu gün adı çəkilən ölkələrin Fransanın qrup rəhbərliyi ilə qərəzli və absurd iddialarla çıxış etmələri hansı mənəvi çərçivəyə sığır? Bunu dünyaya necə izah edə bilərlər?”.
Bölmənin digər xəbərləri
