FUAD ƏSƏDOV: “AZƏRBAYCAN PREZİDENTİNİN FUTBOLUN İNKİŞAFI HAQQINDA SƏRƏNCAMI ÖLKƏNİNFUTBOL İCTİMAİYYƏTİ ÜÇÜN ƏSAS SƏNƏDDİR”
AZƏRTAC-ın müxbiri AFFA-nın baş katibi Fuad Əsədovdan bu Sərəncamla əlaqədar assosiasiya qarşısında qoyulmuş vəzifələrdən danışmağı xahiş etmişdir.
Fuad Əsədov demişdir ki, Azərbaycan Prezidenti İlham Əliyevin futbolun inkişafı haqqında Sərəncamı ölkənin futbol ictimaiyyəti üçün dəyərli və əsas sənəddir. Hazırda qarşımızda bu sənədin həyata keçirilməsi ilə bağlı məsul vəzifə durur. Bu proqramda Azərbaycan futbolunu Avropa səviyyəsinə qaldırmaq üçün 10 il vaxt ayrılmışdır. Burada məşqçilərin, hakimlərin hazırlanmasından tutmuş infrastrukturun yaradılmasına, yeniyetmə futbolunun, xüsusən də uşaq futbolunun inkişaf etdirilməsinədək bir çox məsələlər var. Uşaq futbolunun inkişafına, AFFA ilə yanaşı, Təhsil Nazirliyi də cəlb olunmuşdur. Ötən illərdə yeniyetmələr arasında çoxlu turnir və çempionat keçirilirdi, klublarımızın gələcək oyunçularının yetişdirildiyi uşaq-gənclər məktəbləri fəaliyyət göstərirdi. İlk növbədə, bütün bunları bərpa etmək lazımdır. AFFA ümumtəhsil və digər təhsil müəssisələrinə avadanlıqla və infrastruktur yaratmaqla kömək edəcəkdir. Sərəncamda digər nazirliklər və idarələrlə yanaşı, Səhiyyə Nazirliyinin üzərinə də müəyyən vəzifələr qoyulmuşdur. Nazirliyə İdmançıların Bərpa Mərkəzini yaratmaq bir vəzifə olaraq tapşırılır.
Ölkədə futbolun inkişafına görə məsuliyyət daşıyan əsas orqan kimi, AFFA proqramın müddəalarının yerinə yetirilməsi ilə yaxından məşğul olur. Noyabrın 30-da assosiasiyanın növbədənkənar konfransı keçiriləcəkdir. Konfransda FİFA-nın və UEFA-nın tövsiyələri ilə Nizamnamədə dəyişikliklər ediləcəkdir. UEFA Azərbaycanda 23x12 metr ölçüdə 30 futbol meydançasının inşası üçün 1 milyon İsveçrə frankı ayırmışdır. Lakin biz UEFA-ya həmin məbləğə 40x12 metr ölçüdə standart minifutbol meydançaları tikmək barədə təklif vermişik. 2006-ci ilin sonunda bütün meydançalar hazır olacaqdır.
Hazırda iş adamları futbolun inkişafına maraq göstərir, stadionlar tikir, infrastruktur yaradırlar. Əlbəttə, biz bu proqramın həyata keçirilməsi üçün mümkün olan hər şeyi edəcəyik. Lakin ictimaiyyətin dəstəyi olmadan planlarımızı həyata keçirmək çətindir. Heç bir dövlətdə ölkə yığmasını kimsə əsassız olaraq tənqid etmir, çünki bu, dövlətin imicini yaradan atributlardan biridir. Bizdə isə bəzi qəzetlər, keçmiş futbolçular yeri gəldi-gəlmədi milli futbolumuzda baş verənlərə qara yaxırlar. Onlara sensasiya və vəzifə lazımdır, Azərbaycan futbolunun inkişafı isə, təəssüf ki, onları maraqlandırmır.
