FUTBOL ÜZRƏ 2006-CI İL DÜNYA BİRİNCİLİYİNİN RƏMZİ “YER KÜRƏSİ”DİR

13.09.2003 [03:29]
Çap et
A⁺ A^-

AZƏRTAC-ın xüsusi müxbiri xəbər verir ki, 2006-cı ildə Almaniyada keçiriləcək futbol üzrə növbəti dünya birinciliyinin rəmzi - “FİFA-nın 2006-cı il futbol çempionatının Qlobosu”nun sentyabrın 12-də Berlinin Brandenburq darvazaları qarşısındakı tarixi Paris meydanında təntənəli təqdimmat mərasimi keçirilmişdir.

AFR-in federal kansleri Gerhard Şröder, FİFA-nın prezidenti Yozef Blatter və 2006-cı il dünya birinciliyinin Təşkilat Komitəsinin prezidenti, Almaniya futbolunun “Kayzeri” Frans Bekkenbauer meydanda inşa edilmiş nəhəng rəmzi qlobusun təqdimatı ilə 2006-cı il dünya çempionatının başlanmasına qədər qalan 1000 gün müddətində Almaniyada həyata keçiriləcək zəngin mədəni proqramın startını vermişilər.

Paris meydanında dayaqlar üzərinə qaldırılmış və hündürlüyü 20 metr olan nəhəng “futbol topu” sentyabrın 13-dən başlayaraq növbəti dünya birinciliyinin informasiya xidmət mərkəzinə çevriləcəkdir. Qlobusun daxilində müasir informasiya texnikasının son nailiyyətlərinə əsasən quraşdırılmış kabinələr çempionatın təşkilatçılarının, idman şərhçilərinin və jurnalistlərin sərəncamına veriləcəkdir.

Gündüzlər nəhəng futbol topunu əks etdirən, axşamlar isə elektron işıqlandırma sisteminin qövsi-qüzehli rəngləri ilə yer kürəsinə çevrilən bu sənət əsərinin müəllifi vyanalı multi-mediya sənətçisi Andre Hellerdir.

Belə qlobuslar Berlindən sonra Almaniyanın daha 12 şəhərində quraşdırılacaqdır.