Füzuli rayonunun 35 min hektardan çox ərazisi ermənilər tərəfindən yandırılmışdır
Bakı, 23 avqust (AZƏRTAC). Füzuli rayonunun işğalından 18 il keçir.
Azərbaycan Respublikası Ekologiya və Təbii Sərvətlər Nazirliyinin (ETSN) mətbuat xidmətindən AZƏRTAC-a verilən məlumata görə, 1993-cü il avqustun 23-də ümumi sahəsi 139 min 393 hektar olan Füzuli rayonunun qərb hissəsindən 125 min 368 hektar ərazi ermənilər tərəfindən işğal olunmuşdur.
Məlumatda bildirilir ki, rayonda ümumi ehtiyatları 58 milyon 858 min kubmetr olan Dövlətyarlı, Dilağar əhəngdaşı, 11 milyon 211 min kubmetr ehtiyatlara malik Kürdmahmudlu gil, ehtiyatları 13 milyon 53 min kubmetr olan Quruçay qum-çınqıl qarışığı yataqları var idi.
Bundan başqa, rayonun ərazisində yaşı 200 ildən 1400 ilə qədər olan 11 Şərq çinarı təbiət abidəsi kimi pasportlaşdırılmışdı və işğaladək mühafizə olunurdu.
İşğaldan sonra isə rayonun təbii sərvətləri ermənilər tərəfindən dağıdılmış və amansızcasına talan edilmişdir. ETSN-in “İşğal olunmuş Azərbaycan ərazilərində ətraf mühitə və təbii sərvətlərə dağıdıcı təsiri müəyyənləşdirən (izləyən) operativ mərkəz”i aşkar etmişdir ki, geniş meşə massivləri ilə örtülü olan Dövlətyarlı və Qoçəhmədli kəndlərində ağaclar bütünlüklə qırılmışdır. Eyni zamanda, Yağlıvənd kəndində yolun sağ və sol tərəfindəki böyük yaşıllıqlar tamamilə məhv edilmişdir. Ümumiyyətlə, 2006-2009-cu illərdə rayonun 35 min hektardan çox ərazisi ermənilər tərəfindən yandırılmışdır.
Bölmənin digər xəbərləri
