MƏDƏNİYYƏT
Gənc fleyta ustası Parisdən #senetinledestekle çağırışına qoşulacaq
Bakı, 24 aprel, AZƏRTAC
Gənc fleyta ustası Ağarəhim Quliyev bu gün saat 20.00-da Fransanın paytaxtı Paris şəhərindən Bakı Şəhər Mədəniyyət Baş İdarəsinin #senetinledestekle çağırışına qoşulacaq.
İdarədən AZƏRTAC-a bildirilib ki, gənc olmasına baxmayaraq, bir çox uğurlara imza atan istedadlı musiqiçi izləyicilərə sevimli musiqi aləti - fleytanın incə səsi ilə gözəl bir klassik musiqi gecəsi bəxş edəcək.
Fleyta ustasına sualları isə izləyicilər Baş İdarənin @bakimedeniyyetidaresi və ifaçının @a.gouliyev “Instagram” hesablarından canlı olaraq ünvanlaya biləcəklər.
Qeyd edək ki, Bakı şəhərində musiqiçi ailəsində dünyaya gələn və 9 yaşından fleytada ifa etməyə başlayan Ağarəhim Quliyev L. və M.Rostropoviçlər adına musiqi məktəbində təhsil alıb. Musiqiyə ciddi yanaşması və istedadı 9 yaşında ona “İlin kəşfi” mükafatını qazandırıb. Daha sonra bir çox nüfuzlu yerli və beynəlxalq müsabiqələrin qalibi olub. İtaliya Fleytaçılar Akademiyasının prezidenti Salvatore Lombardi onun sənətini ən yüksək mükafatla dəyərləndirib.
Ağarəhim Quliyev Rusiyanın Samara şəhərində Yuri Başmet adına Musiqi Akademiyasında, Üzeyir Hacıbəyli adına Bakı Musiqi Akademiyasında və Parisin Ecole Normale De Musique Konservatoriyasında təhsil alır.
Kremlin Müqəddəs Georgi zalında polkovnik Orlovun dirijorluğu altında Rusiya Prezidentinin orkestrinin müşayiəti altında solo fleyta ilə çıxış edən ilk azərbaycanlı musiqiçidir. O, həmçinin Nəsiminin yubiley tədbirləri zamanı UNESCO-nun Parisdəki mənzil-qərargahında solo ifa ilə çıxış edib.