Gəncəyə raket hücumunun ikinci ildönümü ilə bağlı dəyirmi masa keçirilib
Bakı, 11 oktyabr, AZƏRTAC
Oktyabrın 11-də Beynəlxalq Münasibətlərin Təhlili Mərkəzində (BMTM) Ermənistanın 2020-ci il oktyabrın 11-də Gəncəyə raket hücumunun ikinci ildönümü ilə bağlı dəyirmi masa keçirilib.
AZƏRTAC xəbər verir ki, tədbirdə əvvəlcə Azərbaycanın ərazi bütövlüyü uğrunda canından keçmiş şəhidlərimizin ruhu bir dəqiqəlik sükutla yad edilib.
BMTM-in İdarə Heyətinin sədri Fərid Şəfiyev bildirib ki, ərazilərimizin işğalı dövründə Ermənistan tərəfindən xalqımıza qarşı xeyli sayda cinayətlər törədilib və iki il bundan əvvəl oktyabrın 11-də gecə saatlarında Gəncə şəhərinə edilən raket hücumu da bu cinayətlərdən biridir: “Ermənistan ölkəmizə və xalqımıza qarşı həyata keçirdiyi müharibə cinayətlərinə görə cavab verməlidir. Beynəlxalq təşkilatlar bununla bağlı münasibət bildirməlidir”, - deyə Fərid Şəfiyev qeyd edib.
Baş Prokurorun xüsusi tapşırıqlar üzrə böyük köməkçisi, kiçik ədliyyə müşaviri İlqar Səfərov Azərbaycanın ikinci böyük şəhəri olan Gəncənin 2020-ci ilin oktyabrında dəfələrlə raket və artilleriya hücumuna məruz qaldığını və bu hadisələr zamanı 6 ailənin bütün üzvlərinin tamamilə həlak olduğunu diqqətə çatdırıb.
Onun sözlərinə görə, Azərbaycan Baş Prokurorluğunun İstintaq İdarəsində Gəncə hadisələri ilə bağlı təhqiqat aparılır. İlqar Səfərov əlavə edib ki, Vətən müharibəsi dövründə hərbi cinayətlər Azərbaycan ərazisində törədildiyinə görə bunu edənlər barəsində ölkəmizin Azərbaycan Cinayət Məcəlləsinin müvafiq maddələri ilə cinayət işləri başlanılıb və günahkarlar məsuliyyətə cəlb olunacaqlar.
Xarici İşlər Nazirliyinin Mətbuat Xidməti İdarəsinin rəisi Leyla Abdullayeva diqqətə çatdırıb ki, Ermənistanın Azərbaycanın dinc əhalisinə qarşı etdiyi raket hücumları birmənalı olaraq müharibə cinayətidir. Onun sözlərinə görə, bu addımlar insan haqları və beynəlxalq hüququn fundamental prinsiplərinin pozulması deməkdir: “Müharibə bitdikdən sonra insan hüquqlarının pozulması ilə bağlı Avropa İnsan Haqları Məhkəməsində və irqi ayrı-seçkiliklə bağlı Beynəlxalq Ədalət Məhkəməsində vəsatət qaldırılıb. Hər iki vəsatətdə Gəncə hadisələri yer alıb. Bu kimi işlərə uzun müddətdə baxılır və proses davam edir. Azərbaycan Ermənistan tərəfindən törədilən cinayətlərə görə bütün imkanlardan istifadə edəcək”, - deyə XİN-in Mətbuat Xidməti İdarəsinin rəisi vurğulayıb.
Müdafiə Nazirliyinin Beynəlxalq Hərbi Əməkdaşlıq İdarəsinin Beynəlxalq Təşkilatlarla və Qərb ölkələri ilə əməkdaşlıq şöbəsinin rəis müavini, polkovnik-leytenant Rəşad Əhmədov çıxışında bildirib ki, müharibə zamanı mülki əhalinin hədəfə alınmasının beynəlxalq hüququn norma və prinsiplərinin, o cümlədən mülki əhalinin hüquqlarının qorunmasına dair Cenevrə Konvensiyasının kobud şəkildə pozulması deməkdir. Onun sözlərinə görə, hərbi əməliyyatların aparıldığı ərazidən 80 kilometr uzaqlıqda yerləşən Gəncə şəhərinin vurulması hərbi cinayətdir, terror aktıdır və qınanmalıdır. Müdafiə Nazirliyinin rəsmisi müharibə zamanı Azərbaycan Ordusunun beynəlxalq hüququn norma və prinsipləri çərçivəsində fəaliyyət göstərdiyini vurğulayıb.
BMTM-in aparıcı məsləhətçisi Mətin Məmmədli çıxışında bu kimi müharibə cinayətlərinin sülh prosesinə mane olduğunu qeyd edib. Bildirib ki, Azərbaycan ilə Ermənistan arasında danışıqlar, həmçinin humanitar istiqamətdə aparılır və Ermənistan bu sahədə də qeyri-konstruktivlik nümayiş etdirir. Bildirib ki, bizim Ermənistandan gözləntimiz odur ki, törətdiyi cinayətləri etiraf etsin və bu cinayətlərin hüquqi, siyasi, iqtisadi və mədəni məsuliyyətini daşısın. Bu olmadığı halda regionda davamlı sülhdən danışıla bilməz”.
Dəyirmi masa mövzu ətrafında müzakirələrlə davam etdirilib.
Bölmənin digər xəbərləri
