Gənclər eko-menecment sahəsində məlumatlandırılmışlar
Bakı, 5 sentyabr (AZƏRTAC). ATƏT-in Bakı Ofisi və “Vətəndaş Cəmiyyətində Debat” İctimai Birliyi tərəfindən gənclər üçün təşkil edilmiş “Green corps” yay məktəbi işini yekunlaşdırmışdır. “Təmiz Şəhər” Açıq Səhmdar Cəmiyyətinin (ASC) layihələrin idarəolunması və ictimaiyyətlə əlaqələr şöbəsinin müdiri Oqtay Məmmədov yay məktəbində təlimçi kimi iştirak etmişdir.
ASC-nin mətbuat xidmətindən AZƏRTAC-a bildirmişlər ki, yay məktəbinin məqsədi eko-menecment, ətraf mühitin mühafizəsi, layihələrin hazırlanması və idarə edilməsi ilə bağlı gənclərin məlumatlandırılması olmuşdur.
Yay məktəbində eko-menecment sahəsində ixtisaslaşmış yerli və beynəlxalq təlimçilər mühazirələr oxumuşlar. Mühazirələrdə məişət tullantılarının idarə edilməsi ilə bağlı həyata keçirilən layihələr, o cümlədən bərk məişət tullantılarının yandırılması və tullantıların çeşidlənməsi zavodları haqqında ətraflı məlumat verilmişdir.
Eyni zamanda, Prezident İlham Əliyevin 28 dekabr 2011-ci il tarixli Sərəncamına əsasən yaradılmış Balaxanı Sənaye Parkında görülən işlərdən, gələcək planlardan və yaşıl biznes imkanlarından da söz açılmışdır.
Mühazirələrdə vurğulanmışdır ki, tullantıların düzgün idarə edilməsi ətraf mühitin mühafizəsini təmin edən ekoloji bir proses olmaqla yanaşı, həm də sağlam sosial-iqtisadi inkişafa dəstək verə bilər.
Sonda iştirakçıları maraqlandıran suallar cavablandırılmışdır.
Bölmənin digər xəbərləri
